Pesë vatra zjarri vijojnë të mbeten aktive në Shqipëri. Në përditësimin e fundit të Ministrisë së Mbrojtjes, deri në orën 14:00 janë raportuar 10 vatra zjarri, pesë prej të cilave aktive, ndërsa katër të tjera janë nën monitorim.
Në operacionet për shuarjen e zjarreve janë angazhuar 21 automjete zjarrfikëse dhe 153 forca operacionale. Në mbështetje të tyre janë vendosur edhe 125 efektivë të Forcave të Armatosura, si dhe dy helikopterë të Forcës Ajrore.
Në Dajt, situata vijon të mbahet nën monitorim.
Në Cikallesh, bashkia Kavajë, zjarri është shuar plotësisht dhe zona po monitorohet. Ndërkohë, në Priskë të Madhe vijojnë operacionet me katër automjete zjarrfikëse, 15 efektivë të forcave zjarrfikëse dhe mbështetjen e një helikopteri të Forcës Ajrore. Sipas autoriteteve, nuk ka rrezik për zonat e banuara.
Në Mallakastër, vatrat në zonën Riban–Ngraçan–Panahor–Çyçen janë shuar plotësisht dhe po mbahen nën monitorim. Po ashtu, zjarri në Drenie, bashkia Patos, është vënë nën kontroll të plotë.
Flakët vijojnë të jenë aktive në disa zona të tjera. Në Abaze, Krujë, zjarri vijon, por nuk paraqet rrezik për zonat e banuara. Në Krastë, flakët kanë rritur intensitetin dhe janë përhapur në një masiv pyjor. Në terren po operojnë forcat vendore, 50 efektivë të Forcave të Armatosura dhe një helikopter i Forcës Ajrore. Edhe në këtë zonë, autoritetet deklarojnë se banesat nuk janë të rrezikuara.
Në Vilëz, bashkia Kurbin, ndërhyrja e forcave vendore dhe 35 efektivëve të Forcave të Armatosura mundësoi shuarjen e plotë të zjarrit rreth orës 13:00.
Aktive vijojnë të jenë edhe vatrat në malin e Nemëçkës, bashkia Përmet, si dhe në Goraj–Budishë, bashkia Malësi e Madhe. Të dyja vatrat ndodhen në terrene të vështira dhe në lartësi të mëdha, ndërsa sipas Ministrisë së Mbrojtjes nuk paraqesin rrezik për zonat e banuara.
Autoritetet bëjnë me dije se puna për shuarjen e vatrave aktive vijon, ndërsa nuk raportohet aktualisht rrezik i drejtpërdrejtë për zonat e banuara.
Agjencia Kombëtare e Mbrojtjes Civile dhe strukturat e sistemit të mbrojtjes civile vijojnë koordinimin dhe monitorimin e situatës në të gjithë territorin.
Sërish flakë në Krastë të Krujës, ndërhyn edhe helikopteri! Zjarri pranë depove të eksplozivit, vendoset perimetër sigurie
Zjarri në Krastë të Krujës është rishfaqur dhe është përhapur në masiv pyjor. Mësohet se helikopteri i ushtrisë është rikthyer për të vijuar me ndërhyrjen pasi në këtë zonë gjenden depo eksplozivi. Forcat zjarrfikëse të Krujës kanë krijuar një perimetër sigurie për të mos i lënë flakët të afrohen pranë depove.
Sipas Ministrisë së Mbrojtjes, në terren po operojnë 50 efektivë të FA-së dhe 1 helikopter i Forcës Ajrore. Megjithatë, nuk ka rrezik për banesat.
Mallakastër/ Merr fund beteja me flakët, nuk ka më vatra aktive zjarri në Drenie dhe Vlosh (VIDEO)
Situata e zjarreve në zonën pyjore të Drenies, në kufirin mes bashkive Patos dhe Roskovec, paraqitet e qetësuar. Burime nga terreni konfirmojnë se aktualisht nuk ka më vatra aktive zjarri në pyllin me pisha të kësaj zone.
Read more:Kanionet e Gjipesë/ Nxirren 4 turistët e bllokuar në greminë, njëri prej tyre me fraktura
Edhe pse flakët janë shuar, në disa zona vijojnë të shfaqen vatra të vogla që nxjerrin tym, kryesisht nga trungje dhe dru të djegur. Forcat zjarrfikëse po ndërhyjnë menjëherë për t’i shuar ato, me qëllim që të mos krijohet mundësia e riaktivizimit të zjarrit nga era.
Burimet nga terreni bëjnë me dije se situata mbetet nën kontroll dhe se nuk ka më fronte apo vatra aktive zjarri në pyllin me pisha të zonës së Drenies dhe Vloshtit.
Forcat që morën pjesë në operacion vijojnë monitorimin e territorit, pasi rreziku i riaktivizimit mbetet i pranishëm për shkak të temperaturave të larta, terrenit të djegur dhe erës që vijon të fryjë.
Aktualisht, në zonë vërehen kryesisht drurë të djegur që vijojnë të nxjerrin tym, të cilët po shuhen nga ekipet në terren për të garantuar izolimin përfundimtar të zjarrit.
Zjarri në Krastë të Krujës, 50 efektivë në terren për izolimin e plotë të flakëve! Pamjet nga ajri tregojnë zonën e djegur (VIDEO)
Flakët në Krastë të Krujës janë vënë nën kontroll. 50 efektivë janë angazhuar për izolimin e plotë të zjarrit, një ndërhyrje e zhvilluar në terren të vështirë, njofton Ministria e Mbrojtjes.
Pamjet nga lart tregojnë edhe sipërfaqen e djegur dhe tymin që ngrihet në këtë zonë.
Siç është raportuar më herët, tani zjarri nuk i kërcënon më banesat.
“50 efektivë të Forcave të Armatosura janë angazhuar në Krastë të Krujës, ku prej ditës së djeshme po punohet për izolimin e plotë të zjarrit.
Situata aktualisht është nën kontroll, ndërsa ndërhyrja është zhvilluar në një terren të vështirë.
Efektivët e Forcave të Armatosura, së bashku me forcat zjarrfikëse dhe strukturat e emergjencave vijojnë të qëndrojnë në terren për monitorimin e vatrave dhe ndërhyrjen në rast nevoje.
Zjarri në Drenie të Patosit dhe në zonën e Mallakastrës, më shumë se 40 forca po punojnë për shuarjen e flakëve (VIDEO)
Zjarrfiksësit kanë vijuar punën edhe mëngjesin e sotëm për izolimin e vatrës së zjarrit në zonën e Mallakastrës dhe në Drenie, bashkia Patos.
Më shumë se 40 forca zjarrfikëse janë angazhuar për fijen e plotë dy zjarreve.
