Pesë vatra zjarri aktive janë aktualisht në të gjithë vendin ndërsa 5 janë nën mbikëqyrje dhe 1 është shuar.
Vëmendja kryesore mbetet në Dajt, ku vijon ndërhyrja me 20 forca të ushtrisë dhe 40 të zjarrfikësve. Pavarësisht terrenit të vështirë, nuk ka rrezik për zonat e banuara. Ndërkohë një tjetër vatër zjarri është aktivizuar mbrëmjen e sotme në Dajt, ku po punohet edhe me një avion për shuarjen e flakëve.
Në Dibërvijon aktive vatra në Ballenjë, pa rrezik për zonat e banuara. Kryesisht zjarri është në territor të thepisur dhe shkëmbor, me 9 efektivë në terren.
Në Qafë e Helmës, Bulqizë – vatra vijon aktive dhe po monitorohet nga 4 efektivë. Nuk paraqitet rrezik për banesat. Në Valikardhë – operacioni vijon me 1 automjet zjarrfikës dhe 6 efektivë. Po punohet për izolimin e vatrës, e cila favorizohet nga era dhe temperaturat e larta.
Mali i Dardhës, Librazhd– vatra është riaktivizuar në një sipërfaqe pyjore prej rreth 7–8 hektarë. Në terren ndodhen forcat zjarrfikëse dhe nuk rrezikohen banesa.
Ndërsa në zonat e Gjegjanit, Gojanit, Prozhmit dhe Tërbunit në Pukë nuk kanë më vatra aktive dhe vijojnë vetëm nën monitorim.
Për menaxhimin e situatës janë angazhuar 65 forca operacionale dhe 2 automjete zjarrfikëse, ndërsa Forcat e Armatosura mbështesin operacionet me 20 efektivë dhe 1 helikopter.
Pavarësisht menaxhimit dhe angazhimit të strukturave të mbrojtjes civile për të minimizuar dëmet nga zjarret, veçanërisht në zonat e banuara, mijëra hektarë pyje raportohen të djegura nga zjarret e kësaj vere.
Lajm në përditësim…
Zjarr në malin e Dajtit në Tiranë, një avion në operacion për shuarjen e flakëve
Një sipërfaqe me pyje në malin e Dajtit në Tiranë është përfshirë nga flakët.
Report Tv ka siguruar pamjet, ku duket se flakët kanë përfshirë një hapësirë të konsiderueshme.
Ndërkohë nga ajri po operon edhe një avion, me qëllim shuarjen e flakëve.
