Sekretari i Përgjithshëm i PD, Flamur Noka, ka reaguar pas zhvillimeve të fundit që kanë prekur drejtues dhe ish-drejtues të institucioneve kryesore të sigurisë në vend, duke e drejtuar përgjegjësinë politike te kryeministri Edi Rama.
Në “Minuta e parë”, Noka iu referua kontrolleve të SPAK në banesën e ish-drejtorit të Përgjithshëm të Policisë, Ilir Proda, si dhe masës “arrest në shtëpi” dhe pezullimit nga detyra të drejtoreshës së SHISH, Vlora Hyseni. Sipas tij, përfshirja në hetime e drejtuesve të institucioneve të rëndësishme nuk mund të trajtohet vetëm si përgjegjësi individuale. Ai akuzoi qeverinë si të korruptuar dhe tha se përgjegjësia duhet të kërkohet edhe te personat që kanë bërë emërimet.
Noka solli si shembull emërimet e Ilir Prodës dhe Vlora Hysenit, duke theksuar se ata nuk janë vendosur vetë në krye të institucioneve.
Mbi hapat e radhës të kryeministrit pas skandalit, Noka parashikoi se Rama do të përpiqet ta kalojë situatën pa marrë përgjegjësi politike, duke përdorur, sipas tij, të njëjtën strategji komunikimi që ka ndjekur edhe në raste të tjera.
“Nëse do të kishte drejtësi, nga Rama në një përgjegjës të një sektori do të ishin të gjithë brenda. Janë të gjithë të korruptuar në rrënjë.
Si mund të rrijë një kryeministër kur është i zhytur në çdo skandal.
Proda nuk u vetëemërua, as Hyseni edhe pse dyshohej për spiunazh në Kosovë.
Kur i emëron edhe pse je i paralajmëruar, përgjegjësia nuk është më individuale, por politike dhe e ekipit.
Jam i sigurt që Rama do të bëjë atë që ka strategji. Do besojë se çudia më e madhe zgjat 3 ditë, do e kalojë me një batutë dhe kaq.
Ka rënë shteti, drejtësia mund të jetë duke funksionuar vende-vende, por shteti ka vdekur.
Duke dalë Proda, Agasi, Hyseni, tregon që shteti është organizatë kriminale, për këtë duhet t’i akuzojë SPAK, nuk ka përgjegjësi individuale.
Jam shumë skeptik me hetimet e SPAK, por nëse do të kishte drejtësi, shkohet tek kreu i organizatës, Rama”, tha ai.
