Bashkia e Tiranës ka rinisur prej disa javësh procesin e evidentimit të objekteve të palegalizuara, duke u bërë thirrje qytetarëve që kanë aplikuar ndër vite për legalizim të paraqiten pranë njësive administrative ose zyrës së pritjes së qytetarëve për të përditësuar të dhënat e kontaktit.
Sipas Drejtorisë së Koordinimit dhe Legalizimit, një pjesë e aplikimeve datojnë që nga vitet 2005-2006, por në shumë raste institucionet nuk arrijnë të kontaktojnë qytetarët për shkak të ndryshimit të numrave të telefonit apo të dhënave të tjera. Për këtë arsye, Bashkia dhe Agjencia Shtetërore e Kadastrës po vijojnë evidentimin në terren për të përshpejtuar procesin.
“Ftoj të gjithë qytetarët e Tiranës që kanë aplikuar për të legalizuar objektet e tyre nga 2005-2006 dhe në vazhdimësi, të cilit ne hasim një problematikë të madhe në gjetjen e kontakteve të qytetarëve, të cilët kanë aplikuar dhe nuk e kanë më atë kontakt që të kontaktohet nga drejtoria e koordinimit të legalizimeve të Bashkisë së Tiranës, e cila bashkëpunon me ASHK për ta përfunduar sa më shpejt këtë proces. I bëj thirrje të gjithëve kush ka vetë deklaruar të paraqitet pranë zyrës së pritjes së qytetarit në Bashkinë e Tiranës ose tek njësitë administrative përkatëse që të bëjë një kërkesë për të na vënë në dijeni dhe të vijojmë me procesin dhe evidentimin e qytetarëve që janë në proces legalizimi. Jemi tek zona e Selitës, në një zonë që ka pasur shumë problematikë. Këtu kanë përfunduar pothuajse të gjithë matjet dhe verifikimet e territorit. Kanë filluar të dalin dhe vetë deklarimet duke qenë se ka edhe disa mangësira për mungesë dokumentacioni që janë në plotësim e sipër nga qytetarët dhe është drejt përfundimit kjo si zonë. Njëkohësisht kemi punuar dhe te zona e shinave të trenit, linja e hekurudhës, që ka pasur një problematikë shumë të madhe aty si zonë, pothuajse është përfunduar i gjithë evidentimi dhe janë përcjellë dokumentacionet pranë drejtorive vendore të ASHK për përpunimin dhe implementimin e vendimeve të legalizimi”, u shpreh Shkëlqim Braushi, drejtor i Drejtorisë së Koordinimit dhe Legalizimit.
Aktualisht Drejtoria e Koordinimit dhe Legalizimit ka depozituar në Agjencinë Shtetërore të Kadastrës 4677 matje, ku për 60 % të tyre janë dhënë edhe vendimet. Në total janë matur 37 pallate, që përkojnë me 2886 apartamente dhe njësi shërbimi, ku për 85 % të tyre, janë dhënë vendimet e legaliizmit, ndërtesa pjesa tjetër, është në proces plotësim dokumentacioni. Gjatë kësaj fushate evidentimi dhe matjesh të objekteve të palegalizuara, qytetarët i kanë mbështetur strukturat locale në terren, duke shprehur gatishmërinë e tyre për të qenë pjesë e këtij procesi, i cili është drejt finalizimit, por edhe drejt përfundimit të afatit ligjor.
“Pothuajse e gjithë Tirana është zonë problematike, por qytetarët e kanë përqafuar këtë nismë, është shpresa e tyre e fundit që së shpejti të përfundojë ky proces në të gjithë Tiranën duke qenë se Tirana ka një gjeografi shumë të madhe, por ne si Bashki bashkërisht dhe me ASHK po ecim përpara për ta realizuar dhe për ta përfunduar këtë proces sa më shpejt sipas afatit ligjor që është në fuqi” tha Braushi.
