Në Tiranë është firmosur një marrëveshje e re mes Shqipërisë dhe Italisë për shëndetin publik, që synon forcimin e sistemit dhe rritjen e kapaciteteve në përballjen me sfidat e kohës.
Memorandumi i Bashkëpunimit u nënshkrua mes Institutit të Shëndetit Publik dhe Instituto Superiore di Sanità në Itali, duke formalizuar një partneritet të qëndrueshëm mes dy institucioneve.
Ministrja e Shëndetësisë, Evis Sala, theksoi se marrëveshja prek disa nga fushat më të ndjeshme të shëndetit publik.
“Përmes këtij Memorandumi, ne vendosim një kornizë të qartë bashkëpunimi në fusha prioritare si survejanca epidemiologjike, rezistenca antimikrobiale, shëndeti mjedisor, siguria ushqimore dhe sëmundjet jo të transmetueshme, duke i dhënë një rol të veçantë inovacionit dhe teknologjisë në shëndetin publik” – theksoi ministrja Sala.
Sala u ndal edhe te qasja e re që po ndjek sistemi shëndetësor.
“Në një botë ku kërcënimet ndaj shëndetit nuk njohin kufij, ne kemi zgjedhur të mos jemi thjesht reagues, por kontribues aktivë në zgjidhje. Për këtë arsye po forcojmë qasjen One Health, duke e parë shëndetin si një ekosistem të ndërlidhur midis njeriut, mjedisit dhe kafshëve”, deklaroi ministrja.
Një nga pikat kryesore të projektit është ngritja e Korpusit të ri të Laboratorëve, ku do të përfshihen të gjithë laboratorët e sëmundjeve infektive dhe jo infektive. Për herë të parë parashikohet edhe krijimi i dy laboratorëve të nivelit të tretë të biosigurisë.
Ky kompleks do të shërbejë jo vetëm për diagnostikim, por edhe për kërkime shkencore dhe reagim më të shpejtë ndaj emergjencave shëndetësore, ndërsa do të pajiset me teknologjinë më të fundit sipas standardeve europiane.
Ambasadori italian në Tiranë, Marco Alberti, vlerësoi zgjerimin e vazhdueshëm të partneritetit strategjik ndërmjet dy vendeve në sektorin e shëndetësisë, ndërsa theksoi se memorandimi i firmosur sot, është pjesë e marrëveshjes kuadër ndërmjet dy qeverive.
Ndërsa presidenti i Instituto Superiore di Sanità, Rocco Bellantone, theksoi se memorandumi i jep vazhdimësi bashkëpunimit të deritanishëm dhe krijon një program të ri pune me fokus te e ardhmja.
Memorandumi i Bashkëpunimit ndërmjet ISHP dhe ISS, përveç se do të forcojë bashkëpunimin institucional në fushën e shëndetit publik, gjithashtu do të mundësojë zhvillimin profesional të teknikëve përmes shkëmbimit të praktikave, mundësinë e trajnimit për stafet dhe rritjen e kapaciteteve nëpërmjet programeve të përbashkëta dhe eksperiencës së ndërsjelltë.
