Batalioni i Parë Mjekësor i Veçantë i Ukrainës e mori automjetin falë një mbledhjeje fondesh të mbështetur nga këngëtarja me origjinë shqiptare Dua Lipa.
Kamionçina do të përdoret për evakuime dhe misione në zonën e luftimeve. Fondet u mblodhën në një aktivitet bamirësie nga Service95, një platformë e themeluar nga ylli i muzikës pop.
Paratë u transferuan tek “Driving Ukraine”, një organizatë që modifikon automjete për mjekët dhe ushtrinë.
“Mundësitë që Dua Lipa të ndihmonte në mbledhjen e fondeve për një automjet për njësinë tonë nuk ishin të larta… por ato nuk ishin kurrë zero”, tha ushtria ukrainase në një reagim krah një video të publikuar ku në sfond dëgjohej kënga e artistes ‘Levitating’
Dua Lipa e ka zgjeruar punën e saj bamirëse përmes platformës së saj Service95, duke mbështetur përpjekjet ndërkombëtare të ndihmës.
Projektet e fundit përfshijnë mbështetjen e iniciativës së udhëhequr nga gratë, Convoy 55, dhe Fondacionit të saj Sunny Hill, i cili financon programe sociale në Kosovë.
