Në rrjetet sociale po qarkullon lajmi se presidenti ukrainas Volodymyr Zelenskyy mban një vepër arti të vjedhur në zyrën e tij. Por analiza e pamjeve filmike dhe origjina e tyre, sipas Euroneës, tregon se pretendimi është i rremë dhe pjesë e një fushate të koordinuar dezinformimi.
Postimet e ndara në rrjetin social X, paraqesin Zelenskin në zyrën e tij në Kiev, që gjoja po jep në një intervistë për BBC-në. Pas analizës rezultoi se zëri është gjeneruar duke përdorur inteligjencën artificiale, ndërsa elementët vizualë, u ndryshuan dixhitalisht për t’i dhënë klipit një sens autenticiteti.
Në sfond, është e dukshme piktura “Natyrë e qetë me qershi” e francezit Pol Sezan. Postimet sugjeruan se piktura, e vjedhur së fundmi në Itali, ka gjetur rrugën e saj në murin e presidencës së Ukrainës. Është e vërtetë se kjo pikturë ishte mes tre veprave të vjedhura nga Fondacioni Magnani Roça natën midis 22 dhe 23 marsit pranë qytetit të Parmës.
Vlera e pikturave të vjedhura është përllogaritur në 9-10 milionë euro. Por presidenca ukrainase i hodhi poshtë pretendimet se piktura e vjedhur ndodhet në zyrën e Zelenskit, duke këmbëngulur se ato janë krejtësisht të rreme.
Pamjet e manipuluara bazohen në një intervistë të regjistruar tre muaj më parë nga agjencia e lajmeve Associated Press. Fushata dezinformuese për pikturën e vjedhur dhe që ndodhet në zyrën e Zelenskit, nuk është një rast i izoluar.
Në tetor të vitit 2025, Antibot4Navalny, një grup anonim studiuesish të dezinformimit, nxori në dritë një rrjet të ngjashëm llogarish që shpërndanin pretendime të rreme se refugjatët ukrainas ishin arrestuar nga policia franceze në Paris për vjedhjen e ndodhur në Luvër.
