Edhe Zonja e Parë dhe Mbretëresha po marrin pjesë në përpjekjen për të riparuar dëmtimet në “marrëdhënien speciale” mes Shteteve të Bashkuara dhe Britanisë së Madhe. Për ceremoninë zyrtare të mirëseardhjes në Shtëpinë e Bardhë, Melania dhe Camilla ishin të dyja të veshura me të bardha. Të dyja mbanin një kapele me strehë, megjithëse ajo e Zonjës së Parë e fshihte më shumë fytyrën, siç e ka zakon. Camilla, ndërkohë, mbante një çadër: një aksesor i dobishëm, pasi në Uashington ka erë. Si retë metaforike mbi marrëdhënien e krisur mes dy vendeve? Trump bëri shaka me këtë duke e nisur kështu fjalimin e tij: “Sot është një ditë e bukur britanike”, dhe të gjithë shpërthyen në të qeshura, duke thyer akullin.
Nuk dihet nëse Melania e kishte koordinuar veshjen me Camillan për të sinjalizuar një unitet të rigjetur qëllimesh: në fund të fundit, një ditë më parë, duke pritur dy të ftuarit për përshëndetjen e parë, Mbretëresha ishte veshur me të bardha dhe Zonja e Parë me të verdha. Megjithatë, nuk përjashtohet që edhe ky detaj të jetë menduar: burime pranë Melanias bëjnë të ditur se ajo “i ka përgatitur vetë të gjitha” për aspektet më pak strikt politike të vizitës.
Trump vendos dorën në të pasmet e Zonjës së Parë
Sigurisht, të dyja nuk mund të jenë më të ndryshme nga njëra-tjetra. Camilla 78-vjeçare vjen nga shoqëria e lartë, ka qenë një kalorëse e shkëlqyer, ka qenë për një kohë të gjatë e dashura dhe më pas gruaja e dytë e trashëgimtarit të fronit, derisa u bë mbretëreshë, pavarësisht hijes së princeshës Diana kur ai u ngjit në fron. Melania, 56-vjeçe, ka lindur në Jugosllavinë komuniste, në atë që sot është Sllovenia, ka punuar si modele që në moshë të re, para se të prezantohej me “The Donald” dhe të bëhej gruaja e tij e tretë, për të përfunduar më pas me të në Shtëpinë e Bardhë. Megjithatë, diçka i bashkon të dyja biografitë: të dyja u martuan në vitin 2005 me burrin pranë të cilit qëndronin dje. Dhe të dyja kanë ndarë polemikat e tyre, përfshirë skandalin Epstein.
Melania ka mohuar së fundmi se ka pasur lidhje të çfarëdo lloji me financierin pedofil tashmë të vdekur, duke i cilësuar këto aludime si “një përpjekje për të dëmtuar reputacionin tim”. Nga ana e saj, Camilla e nxori nga sikleti Mbretin Charles, të cilit viktimat e Epstein i kishin kërkuar një takim gjatë udhëtimit në Amerikë: ajo vetë, të hënën, u takua me një shoqatë viktimash të abuzimeve seksuale. Por tabloidet angleze më dashakeqe janë më të interesuara për një foto të Reuters që i kap nga pas dy çiftet, teksa përshëndesin turmën nga ballkoni i Shtëpisë së Bardhë, ku Trump vendos dorën në pjesën e pasme të Melanias./La Repubblica
