Deputeti demokrat Klevis Balliu është kallëzuar për shpifje e kryer botërisht në Gjykatën e Posaçme, nga biznesmeni i ndërtimit Armando Lilo. Kallëzimi është regjistruar në GJKKO teksa pritet të hidhet shorti për të caktuar gjyqtarin.
Lilo është pronari i kompanisë Arlis, e cila ka ndërtuar kompleksin pranë farmacisë numër 10 në Tiranë, ku u shkrumbua nga flakët pallati 12-katësh.
Lilo i referohet deklaratave që Balliu ka bërë pas rënies së zjarrit. Deputeti demokrat u shfaq në pallatin e shkrumbuar duke hedhur akuza se ndërtuesi Lilo kishte përdorur materiale të pacertifikuara.
“Jemi të pallati që u dogj, pallati i ndërtuar nga Armando Lilo, i cili nga hiçi mori flakë në mënyrë skandaloze sepse janë përdorur materiale që nuk duhet të certifikohen për ndërtime. Ka një mungesë totale të vëmendjes së shteti ndaj qytetarëve që banonin këtu”, deklaronte Balliu teksa shfaqej tek pallati i shkrumbuar nga flakët.
Read more (GJKKO):Ankimoi pezullimin e afateve të paraburgimit, Apeli i GJKKO rrëzon kërkesën e Veliajt
Prokuroria e Tiranës ende po heton si nisi zjarri, por dyshimet janë se flakët të jenë nisur nga pakujdesia e disa të miturve që po luanin me shkrepëse te plehrat e marketit.
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë
