Ka ngjallur reagime të shumta dhe indinjatë të gjerë videoja që tregon sulmin ndaj një murgeshe katolike franceze, njëherëzi studiuese arkeologjie në Jerusalem.
Pamjet filmike treguan një burrë që e ndjek nga pas, e shtyn me forcë në tokë dhe kthehet ta godasë ndërkohë që ajo ishte shtrirë, derisa ndërhyn një kalimtar që e ndalon.
Murgesha ka pësuar lëndime të lehta dhe nuk raportohet të jetë në gjendje të rëndë, por ngjarja menjëherë u interpretua si tregues i tensioneve fetare të shtuara në rajon dhe sfidat për garantimin e sigurisë dhe bashkëjetesës ndërfetare në Jerusalem.
Read more (Policia):VËZHGIMI I REPORT TV/ Urdhri i ndalimit në letër, monopatinat ‘pushtojnë’ Tiranën! Ekspertët: Të përfshihen në Kodin Rrugor
Policia izraelite arrestoi një 36-vjeçar në lidhje me ngjarjen, duke deklaruar tolerancë zero ndaj dhunës për të garantuar sigurinë e të gjitha komuniteteve fetare në Jerusalem. Sulmi ndodhi në malin Sion, një zonë me rëndësi të veçantë fetare si për hebrenjtë ashtu edhe për të krishterët.
Konsullata franceze e dënoi ashpër incidentin dhe kërkoi që autori të vihet përpara drejtësisë. Ndërkohë, përfaqësues të institucioneve akademike dhe fetare theksuan se ngjarja nuk është e izoluar, por pjesë e një rritjeje shqetësuese të armiqësisë ndaj komunitetit të krishterë.
Read more (Izrael):Lufta me Iranin, SHBA i shet sisteme e armë ushtarake me vlerë 8.6 miliardë dollarë aleatëve në Lindjen e Mesme
Edhe ministria e jashtme e Izraelit e cilësoi sulmin si një akt të turpshëm, në kundërshtim me vlerat e respektit dhe bashkëjetesës fetare. Sipas të dhënave të organizatave monitoruese, dhjetëra incidente kundër të krishterëve janë regjistruar vetëm në muajt e parë të këtij viti, kryesisht akte ngacmimi dhe dëmtimi të objekteve fetare.
