TIRANË– Në Gjykatën Administrative ka nisur seanca e radhës për të shqyrtuar padinë e kryebashkiakut të Tiranës, Erion Veliaj ndaj Ols Dados. Veliaj kërkon shpalljen e pavlefshmërisë së emërimit të tij si prokuror në vitin 2008, me argumentin se nuk ka përfunduar Shkollën e Magjistraturës.
Veliaj është sërish i pranishëm në seancë dhe kërkoi transmetimin e saj live. Por mbrojtja e prokurorit Ols Dado dhe pala tjetër e paditur, KLP, e kundërshtuan kërkesën. Gjykata vendosi vetëm regjistrimin e pjesshëm.
“Është në interesin maksimal që çdo gjë të jetë transparente ndaj e kam kërkuar”, tha Veliaj.
KLP ka kërkuar që Veliaj të mos legjitimohet si palë paditëse.
Në seancë në mbështetje të Veliajt kanë shkuar edhe dy aktorët, Robert Ndrenika dhe Gaz Paja.
Një ditë më parë avokati i Veliajt, Plarent Ndreca ngriti shqetësimin se çështja ndaj prokurorit Dado po tentohet të mbyllet përmes një procesi në errësirë dhe duke shfrytëzuar procedurat. Ndreca është shprehur se pjesë e kësaj ‘harmonie institucionale’ për të mos lejuar shqyrtimin në themel është bërë edhe KLP.
Avokati i Dados i ka kërkuar gjykatës ta rrëzojë padinë, duke theksuar se procesi penal ku Erjon Veliaj është i pandehur, nuk ndikohet, pasi çështja ka edhe një prokuror të dytë, Altin Dumanin.
Lajm në përditësim…
Padia ndaj Dados/ Veliaj: Qytetari mund t’i japë drejtësisë shpatën e pushtetit, por s’mund të pyesë kush e përdor kundër tij?
Kryebashkiaku i Tiranës, Erion Veliaj, reagoi në lidhje me kërkesën e KLP që ai të mos legjitimohet si palë paditëse. Veliaj tha se po pretendohet se ai nuk ka të drejtën ti drejtohet gjykatës për të kërkuar kontrollin e ligjshmërisë së autoritetit që i hoqi lirinë personale. Sipas tij, qytetari mund të hetohet, survejohet apo edhe t’i ndërpritet mandati, por nuk mund të kërkojë verifikimin e autoritetit që ushtron këtë pushtet ndaj tij.
“Si i padituri Dado, ashtu edhe vetë KLP autoriteti që duhej të kishte garantuar ligjshmërinë e ushtrimit të këtij funksioni publik, sot pretendojnë se unë nuk legjitimohem t’i drejtohem gjykatës për të kërkuar kontrollin e këtij autoriteti. Sepse sipas kësaj logjike, qytetari mund të hetohet, të survejohet, të arrestohet, të izolohet dhe të kontrollohet në çdo aspekt të jetës së tij personale, familjare dhe publike; një kryetari bashkie mund t’i ndërpritet ushtrimi i mandatit të dhënë nga qytetarët; qytetarëve mund tu merret nga zyra kryetari i zgjedhur prej tyre, por në momentin që ata i drejtohen gjykatës për të kërkuar verifikimin e ligjshmërisë së autoritetit që ushtron këtë pushtet, atëherë ai nuk konsiderohet më subjekt i mbrojtjes së ligjit, por rrezik për drejtësinë vetë. Pra, qytetari mund t’i japë drejtësisë shpatën e pushtetit për të vepruar në emër të tij, por nuk paska të drejtë të pyesë se kush po e mban atë shpatë, me çfarë legjitimiteti e mban dhe në emër të kujt po e përdor kundër tij. Benjamin Cardozo, një nga figurat më të ndriçuese të Gjykatës Supreme amerikane, paralajmëronte se drejtësia humbet kuptimin e saj në momentin kur garancitë proceduriale reduktohen deri në pikën që qytetari mbetet i pambrojtur përballë pushtetit. Dhe pikërisht këtu lind pyetja thelbësore e kësaj çështjeje”, tha Veliaj.
‘Pala përballë s’do që padia ime të shqyrtohet në themel’, Veliaj në gjykatë: Sipas tyre, s’kam të drejtë të kërkoj legjitimitetin e pushtetit mbi mua e bashkinë
Pala e akuzuar nga Veliaj, pra Ols Dado, dëshiron që gjykata të mos shqyrtojë pretendimin e tij në themel, thotë kryebashkiaku i Tiranës para trupit gjyqësor. Ai shton se sipas pretendimit të palës së paditur, s’mundet t’i kërkojë gjykatës kontrollin e ligjshmërisë së autoritetit që i hoqi lirinë.
Këtu ai ngre pyetjen se cili është legjitimiteti me të cilin po ushtrohet pushteti mbi të që e vendosi nën përgjim dhe hyri në çdo cep të jetës së tij.
“Edhe sot pala përballë, në thelb, nuk kërkon që gjykata të shqyrtojë pretendimin tim në themel. Kërkon që gjykata të mos hyjë fare në themelin e çështjes. Kërkon që Ju, zoti Gjyqtar, të mos shqyrtoni ligjshmërinë e pushtetit që është ushtruar mbi mua dhe mbi institucionin që unë përfaqësoj. Dhe kjo është ajo që e bën këtë çështje shumë më të rëndë sesa një debat procedural. Sepse në thelb të pretendimit që paraqitet përpara Jush qëndron ideja se unë nuk paskam të drejtë t’i kërkoj gjykatës kontrollin e ligjshmërisë së autoritetit që më hoqi lirinë personale; të autoritetit që më vendosi në përgjim; që kontrolloi jetën time private dhe 3 të familjarëve të mi; të autoritetit që hyri në çdo dimension të jetës sime personale dhe institucionale. Pra, pushteti mund të hyjë në çdo qoshe të jetës së qytetarit, por qytetari nuk paska të drejtë të pyesë: “Me çfarë legjitimiteti po ushtrohet ky pushtet mbi mua?”. Pra, pushteti mund të ndërhyjë mbi mandatin e një kryetari bashkie edhe në kundërshtim me kufijtë që vendos vetë ligji, por kryetari i zgjedhur nuk paska të drejtë të pyesë: “Me çfarë legjitimiteti po ushtrohet ky pushtet mbi bashkinë dhe mbi këtë qytet”? Dhe pikërisht këtu qëndron absurdi më i madh i kësaj çështjeje”, tha Veliaj.
‘Ndaj meje e familjes sime është ushtruar vetting penal’, Veliaj në gjykatë: Prej dy vitesh jam nën sulm të pandalshëm e disproporcional
Në fjalimin e tij përpara Gjykatës, kryebashkiaku Veliaj thotë se prej dy vitesh ka pasur një sulm disproporcional të pandalshëm që arriti deri në heqjen e lirisë së tij dhe pamundësinë për të ushtruar mandatin.
Më tej, thotë se vijon të mbahet në paraburgim e izolim edhe pasi Gjykata Kushtetuese i dha të drejtë për mandatin. Veliaj theksoi se çdo aspekt e dimension i tij familjar e personal është vënë nën lupë duke rezultuar në një “vetting” penal. Ai thekson se do të përballet me të vërtetën.
“Prej më shumë se dy vitesh, menjëherë pas zgjedhjes sime për herë të tretë si Kryetar i Bashkisë së Tiranës, jam vënë përballë një sulmi frontal, disproporcional dhe të pandalshëm politik, mediatik dhe juridik; një përplasje që, në përfundim të saj, arriti deri në heqjen e lirisë sime personale dhe në pamundësimin e ushtrimit të mandatit që ma besuan 160 mijë qytetarë të Tiranës. Madje, edhe pasi fitova formalisht mandatin tim në Gjykatën Kushtetuese, pas një përpjekjeje tjetër për ta shfuqizuar atë, unë vijoj të mbahem me këmbëngulje në paraburgim dhe izolim, ndërkohë që vetë ligjshmëria e burimit të atij pushteti penal ndodhet sot përpara kësaj gjykate për shqyrtim. Është kontrolluar çdo aspekt i jetës sime. Është hetuar çdo dimension personal dhe familjar i imi. Mbi mua dhe familjen time është ushtruar, në thelb, një formë e plotë “vetingu” jo administrativ por penal, jashtë çdo standardi normal proporcionaliteti. E megjithatë, gjatë gjithë kësaj kohe, unë kam bashkëpunuar me drejtësinë në çdo moment. Kam kontribuar për të lehtësuar punën e saj. Nuk kam pasur asnjë hezitim, asnjë drojë dhe asnjë mëdyshje për t’u përballur me procesin dhe me të vërtetën as dje, as sot”, thotë kryebashkiaku.
Veliaj në Administrative: Po tentohet që procesi ndaj meje të kalojë shpejt, s’kam akses real në dosje, s’më lejohet të dëgjoj përgjimet
Kryebashkiaku i Tiranës, Erion Veliaj hodhi akuza në seancën në Administrative ndaj Dados se po tentohet që çështja etij të kalojë me shpejtësi dhe proceduralisht e cunguar. Ai tha se nuk i lejohet të ketë akses të plotë dhe real në dosje, as të dëgjojë përgjimet dhe as komunikimi me avokatët ndërkombëtarë.
“Për më shumë se dy vite u përdor çdo mekanizëm i mundshëm politik, mediatik dhe juridik për të më sjellë përpara drejtësisë, në mënyrën më denigruese të mundshme, për një njeri që akoma mban besimin e një qyteti të tërë për drejtimin e tij.
U përdorën hetime, përgjime, kontrolle, ekspozim publik dhe çdo formë tjetër e ushtrimit të pushtetit penal, me argumentin se unë duhej të vihesha përballë drejtësisë. Sot që unë ndodhem përpara drejtësisë, me vullnetin e plotë për t’u përballur me të, paradoksi është se i njëjti mekanizëm duket se nuk do më një përballje reale me drejtësinë, por një përballje të kufizuar, të kontrolluar, të shpejt dhe proceduralisht të cunguar. Sepse nuk kërkohet vetëm kufizimi i lirisë sime fizike. Kërkohet edhe kufizimi i mundësisë sime për t’u mbrojtur efektivisht e përballur me dinjitet. Mua nuk më lejohet të kem akses të plotë dhe real në dosje.
Nuk më lejohet të dëgjoj të gjitha përgjimet e kryera ndaj meje. Nuk më lejohet komunikimi me avokatët e mi ndërkombëtarë. Nuk më lejohet të informoj opinionin publik shqiptar dhe ndërkombëtar mbi natyrën reale të kësaj çështjeje. Sigurisht, nuk më lejohet as ushtrimi i mandatit që qytetarët e Tiranës më kanë besuar. Pra, ndërsa mbi mua ushtrohet çdo kufizim që mund t’i ushtrohet një qytetari, njëkohësisht bëhet gjithçka që unë të mos mund të ushtroj në mënyrë efektive ato të drejta që vetë Kushtetuta e Republikës së Shqipërisë m’i garanton. Dhe sa herë që përpiqem të ushtroj një prej këtyre të drejtave, krijohen pengesa të reja proceduriale, të cilat jo vetëm e bëjnë ushtrimin e tyre gjithnjë e më të vështirë, por përdoren më pas edhe kundër meje, për të justifikuar cenime të mëtejshme të lirisë sime personale. Vetë ky gjykim, ku ndodhemi sot, është një tjetër provë e këtij paradoksi absurd”, thotë Veliaj.
Seanca ndaj Dados/ Veliaj: Procesi i ngritur në errësirë, e di gjithë Shqipëria që Dado nuk është prokuror
Kryebashkiaku i Tiranës, Erion Veliaj në seancën në administrative tha se e di gjithë Shjqipëria që dado nuk është prokuror. Ai shtoi se procesi ndaj tij është ngritur në errësirë.
“E di gjithë Shqipëria tashmë që Ols Dado nuk është prokuror. Ky proces është ngritur në errësirë. KLP për të mbrojtur emrin e vet, duhet të ishte pala më e interesuar. KLP ka kthyer një përgjigje duke thëne që ne nuk merremi me kë është caktuar para nesh. Presidenca ka pranuar një gabim të asaj kohe”, tha Veliaj.
Read more:Will Smith fiton në gjykatë – rrëzohet padia për ngacmim seksual e violinistit Brian King Joseph
Spektaktorët ‘VIP’, të famshmit e artit dhe ekranit mbështesin Veliajn në sallën e gjyqit
Gjyqi në Administrative i Erion Veliajt ka tërhequr edhe disa figura publike.
Për të ndjekur seancën janë të pranishëm aktori Robert Ndrenika, i cili e takoi kryebashkiakun e Tiranës duke e përqafuar dhe puthur në ballë. Aktori i humorit, Gaz Paja, ka hyrë gjithashtu në sallë.
Këngëtari Ardit Çuni dhe moderatorja Xhilda Luzi kanë shfaqur gjithashtu përkrahjen e tyre, si edhe Ilir Yzeiri e Halit Valteri.
Seanca ndaj Dados/ KLP kërkon moslegjitimimin e Veliajt në padi
Në senacën ndaj Ols Dados, KLP kërkoi moslegjitimimin e palëve paditëse.
Gjykata: Pala e tretë, KLP, është thirrur si palë e paditur. Jeni gati për sot apo kërkoni shtyrje të seancës?
KLP: I kemi përgatitur me shkrim materialet tona, seanca mund të vijojë. Ne mbajmë të njëjtin qëndrim, por përpara se të vijojë kjo gjykatë me seancën e themelit, kërkojmë moslegjitimimin e palëve paditëse dhe gjykata të dalë me një vendim të ndërmjetëm.
Plarent Ndreca: Ne kemi parashtrimet përkatëse, por do të na duhet kohë ndoshta më pas për të verifikuar qëndrimin e palës tashmë të paditur.
Transmetimi live i seancës, rrëzohet kërkesa e Veliajt! Gjykata urdhëron fikjen e kamerave (VIDEO)
Është rrëzuar kërkesa e kryebashkiakut Erion Veliaj për transmetimin e plotë të seancës në Gjykatën Administrative. Gjykata ka vendosur lejimin e transmetimit në fillim të saj dhe në disa momente vendimi.
“Regjistrimin dhe transmetimin e pjesshëm të seancës, në çelje dhe në pjesë të seancës kur të japë vendime. Kamerat duhet të regjistrojnë palën paditëse ose gjykatën, jo të tjerë. Gazetarët mund të jenë të pranishëm dhe të mbajnë shënime, por jo regjistrime. Kamerat të fiken dhe mos të regjistrohet”, tha gjykatësi.
Veliaj kërkon transmetimin live të seancës, Ndreca: Liria e medias parim kushtetues, duhet të regjistrohet! Trupi gjyqësor tërhiqet për vendim
Kryebashkiaku Veliaj ka kërkuar transmetimin e drejtpërdrejtë të seancës në Administrative, diçka që kundërshtohet nga avokati i prokurorit Ols Dado. Në argumentimin e tij, Ndreca përsëriti se është një parim kushtetues dhe është një rast që nuk cenon procesin.
“E drejta e çdo qytetari për të qenë në një seancë gjyqësore, pra parimi kushtetues i publicitetit të seancës nuk mund të ndalohet përveçse kur cenohet integriteti i sallave, i një procesi gjyqësor që në këtë rast nuk ndodh. Kushtetuta përcakton lirinë e medias dhe ajo duhet të ketë në dispozicion mjetet që ta ushtrojë veprimtarinë e saj e lirë. Di të them që duhet të regjistrohet”, tha Ndreca ndërsa trupa gjyqësore u tërhoq në dhomën e këshillimit.
‘Ç’të mbeti nga burgu, do ta bëj unë’, Robert Ndrenika përqafon i përlotur Veliajn dhe e puth në ballë (VIDEO)
Pasi hyri në sallën e gjyqit, aktori Robert Ndrenika u takua me kryebashkiakun Veliaj, të cilit i tha “ç’të mbeti nga burgu, do ta vazhdoj unë.”
“Jooo”, i përgjigjet Veliaj, ndërsa aktori e përqafon dhe e puth në ballë, ndërsa kryetari i Tiranës shton: “Mos qaj.”
Padia ndaj Dados/ Veliaj kërkon seance publike: Në interesin tim që çdo gjë të jetë transparente! Mbrojtja e Dados dhe KLP kundër (VIDEO)
Kryebashkiaku i Tiranës Erion Veliaj kërkoi seancë publike në gjyqin ndaj Ols Dados.
“Është në interesin maksimal që çdo gjë të jetë transparente ndaj e kam kërkuar”, tha Veliaj.
Mbrojtja e prokurorit Dado dhe KLP kundërshtuan.
Padia kundër Dados, momenti kur Veliaj mbërrin në Gjykatën Administrative
Kryebashkiaku i Tiranës Erion Veliaj mbërriti sërish në Gjykatën Administrative, për të marrë pjesë personalisht në gjyqin kundër Ols Dados. Për këtë të fundit, Veliaj kërkon shpalljen e pavlefshmërisë së emërimit si prokuror në vitin 2008.
Veliaj mbante në dorë një libër në gjuhën angleze të autores Naomi Alderman, që titullohej “Mos digjni askënd në turrën e druve sot”.
Sot seanca e Veliajt ndaj Dados në Administrative, aktorët Ndrenika dhe Gaz Paja shkojnë për të ndjekur gjyqin (VIDEO)
Dy aktorët, Robert Ndrenika dhe Gaz Paja janë paraqitur në Gjykatën Administrative për të ndjekur seancën e kryebashkiakut të Tiranës, Erion Veliaj ndaj Ols Dados.
