Në kuadër të forcimit të bashkëpunimit ndërkombëtar dhe shkëmbimit të praktikave më të mira në administrimin e pasurive të sekuestruara dhe të konfiskuara, Agjencia e Administrimit të Pasurive të Sekuestruara dhe Konfiskuara (AAPSK) zhvilloi një takim zyrtar pranë zyrave të homologëve italianë të Agjencisë Kombëtare për Administrimin dhe Destinimin e Aseteve të Sekuestruara dhe Konfiskuara nga Krimi i Organizuar (ANBSC), në Itali.
Gjatë takimit, palët diskutuan mbi forcimin e bashkëpunimit institucional dhe ranë dakord për nisjen e procedurave për një marrëveshje bashkëpunimi ndërmjet dy institucioneve, e cila do të fokusohet në shkëmbimin e informacionit, ndarjen e eksperiencave dhe rritjen e kapaciteteve profesionale, në përputhje me standardet dhe praktikat më të mira të Bashkimit Europian dhe atyre ndërkombëtare në fushën e administrimit të aseteve të sekuestruara dhe të konfiskuara.
Kryeadministratorja e AAPSK-së, Risena Xhaja, vlerësoi modelin italian dhe eksperiencën shumëvjeçare të ANBSC-së në luftën kundër krimit të organizuar, si edhe në menaxhimin efektiv të aseteve të paligjshme.
Nga ana tjetër, Drejtoresha e ANBSC-së, Maria Rosaria Lagana, theksoi se thellimi i bashkëpunimit ndërmjet dy institucioneve është në interes të përbashkët të Shqipërisë dhe Italisë, duke pasur parasysh natyrën ndërkufitare të aktiviteteve kriminale dhe afërsinë gjeografike mes dy vendeve.
Në fokus të diskutimeve ishte edhe organizimi i workshopeve të përbashkëta ndërmjet institucioneve, me synim shkëmbimin e eksperiencave profesionale, rritjen e kapaciteteve teknike dhe përmirësimin e performancës.
AAPSK vlerëson se bashkëpunimi ndërkombëtar dhe ndarja e praktikave më të mira mbeten elementë thelbësorë për forcimin e mekanizmave të administrimit të pasurive të sekuestruara dhe të konfiskuara, si dhe për rritjen e efektivitetit në luftën kundër krimit të organizuar.
