Drejtuesi i SPAK, Klodian Braho, dhe kreu i BKH-së, Joni Keta, janë parë këtë të diel së bashku me familjet e tyre në një lokal në periferi të Tiranës. Sipas raportimeve të mediave, dy drejtuesit e institucioneve kryesore të drejtësisë janë bërë bashkë për shkak të një feste familjare.
Në fotot e publikuara nga VNA, Braho shihet teksa hyn në ambientet e lokalit ku po e prisnin familjarë dhe të afërm.
Kujtojmë se Klodian Braho mori drejtimin e Prokurorisë së Posaçme në dhjetor të vitit të kaluar dhe deri tani ka shmangur daljet publike për mediat. Ndërkohë, Joni Keta është parë shpesh në terren gjatë operacioneve të BKH-së, ku ka drejtuar personalisht agjentët e Byrosë Kombëtare të Hetimit.
