Ministria e Punëve të Jashtme ka reaguar sa i përket protestës së studentëve shqiptarë në Shkup për të drejtën e gjuhës shqipe.
Në reagimin publik, Ministria shkruan se gjuha shqipe është një e drejtë themelore e miratuar nga Kushtetuta e Maqedonisë së Veriut.
Ajo shton gjithashtu se sekretari i përgjithshëm i Ministrisë shkoi në Shkup ku u takua me studentët dhe thotë se jo çdo angazhim institucional bëhet domosdoshmërisht publik në kohë reale dhe as reflektohet menjëherë në rrjetet sociale apo në deklarata mediatike
Reagimi i plotë:
Është krejt e pavërtetë dhe për më së paku e padrejtë të tentohet të krijohet përshtypja sikur shteti shqiptar ka qenë indiferent ndaj shqetësimeve të studentëve shqiptarë në Shkup. Përkundrazi, ka pasur angazhim të drejtpërdrejtë institucional dhe diplomatik.
Ambasada e Shqipërisë në Shkup ka qenë në kontakt të vazhdueshëm me studentët dhe me zhvillimet në terren.
Read more:Dy shkrimtarë shqiptarë nderohen me çmime në Bari të Italisë
Vetë Sekretari i Përgjithshëm i MEPJ, i gjendur në Shkup, është takuar personalisht me studentët për të dëgjuar shqetësimet dhe kërkesat e tyre legjitime.
Institucionet shqiptare, as më parë e as në ketë rast, nuk kanë qëndruar pasive përballë kësaj situate.
Është e tepërt të kujtohet se përfaqësitë diplomatike janë pjesë e Ministrisë për Evropën dhe Punët e Jashtme dhe përfaqësojnë zyrtarisht shtetin shqiptar, kudo në botë, përfshirë në Maqedoninë e Veriut.
Çdo angazhim diplomatik është angazhim i vetë shtetit shqiptar.
Read more:Sami Lushtaku nuk iu përgjigj Prokurorisë, Nura thotë se nuk ka ftesë zyrtare
Në mënyrë të veçantë, Ministri për Evropën dhe Punët e Jashtme, Ferit Hoxha, ka reaguar publikisht në mbështetje të studentëve shqiptarë dhe të drejtës së tyre për përdorimin e gjuhës shqipe.
Ai është shprehur se:
“Përdorimi i gjuhës amtare është një e drejtë themelore, e garantuar nga Kushtetuta e Maqedonisë së Veriut dhe Ligji për Përdorimin e Gjuhëve, e cila nuk mund dhe nuk duhet të ngushtohet apo vonohet nga asnjë procedurë.”
Po ashtu, ministri Hoxha ka vlerësuar qëndrimin e studentëve duke theksuar se:
“Studentët meritojnë përgëzim për angazhimin qytetar dhe mënyrën demokratike me të cilën kanë artikuluar kërkesën e tyre.”
Njëkohësisht, duhet kuptuar se diplomacia ka kodet, format dhe mekanizmat e saj të komunikimit dhe veprimit. Jo çdo angazhim institucional bëhet domosdoshmërisht publik në kohë reale dhe as reflektohet menjëherë në rrjetet sociale apo në deklarata mediatike.
Shpesh, puna diplomatike zhvillohet përmes kontakteve të drejtpërdrejta, komunikimeve institucionale dhe kanaleve zyrtare, me qëllim arritjen e rezultateve konkrete dhe efektive.
Kjo çështje kërkon përgjegjësi dhe seriozitet, jo deklarata politike për konsum mediatik.
Të drejtat e shqiptarëve në Maqedoninë e Veriut dhe respektimi i gjuhës shqipe janë çështje që meritojnë unitet institucional dhe mbështetje reale, jo deformim të fakteve.
