Si rezultat i hetimeve sa i përket zjarrit të rënë në tregun e fruta-perimeve disa ditë më parë në Lushnje, është identifikuar dhe shpallur në kërkim një shtetas i dyshuar si autor i zjarrvënies, ndërsa vijon puna për identifikimin e një shtetasi tjetër të përfshirë në ngjarje.
Më 19 maj, sallën operative të Komisariatit të Policisë Lushnjë ka mbërritur njoftimi se tregu ishte përfshirë nga zjarri. Shërbimet e Policisë dhe zjarrfikëse kanë shkuar menjëherë në vendngjarje dhe, brenda pak orësh, kanë mundur të shuajnë flakët.
Read more:Incidenti në Mamurras/ Kush është i arrestuari që ndodhej në makinë me 23-vjeçarin e plagosur
Si pasojë e zjarrit janë dëmtuar disa tezga dhe produkte të tregtarëve. Fillimisht dyshohej se shkak ishte një shkëndijë elektrike, por hetimet e mëtejshme nën drejtimin e Prokurorisë kanë mundësuar identifikimin dhe shpalljen në kërkim të shtetasit K. Ç., banues në Durrës, si njëri prej autorëve të mundshëm.
Nga pamjet filmike rezulton se K. Ç. ishte pranë tregut së bashku me një shtetas tjetër ende të paidentifikuar. Dyshohet se të dy kanë ndezur zjarrin dhe më pas janë larguar nga vendngjarja.
Policia vijon punën për kapjen e K. Ç., si dhe për identifikimin dhe kapjen e shtetasit tjetër. Materialet procedurale janë referuar Prokurorisë për veprime të mëtejshme.
