Presidenti bjellorus Alexander Lukashenko mori pjesë për herë të parë këtë javë në stërvitjet ushtarake që simulojnë përdorimin e armëve taktike dhe strategjike bërthamore së bashku me Rusinë, duke shtuar shqetësimet ndërkombëtare për përshkallëzimin e konfliktit në rajon.
Al Jazeera shkruan se nga e marta deri të enjten, Lukashenko dhe presidenti rus Vladimir Putin drejtuan manovra të përbashkëta ushtarake që përfshinë zona nga Europa Lindore deri në Paqësor. Në stërvitje morën pjesë qindra raketahedhës rusë, avionë luftarakë, anije ushtarake dhe nëndetëse bërthamore.
“Është e rëndësishme të rrisim nivelin e gatishmërisë së forcave strategjike dhe taktike bërthamore”, deklaroi Putin gjatë stërvitjeve.
Ndërkohë, Lukashenko u përpoq të justifikonte lëvizjen duke deklaruar: “Ne nuk kërcënojmë askënd. Por kemi armë të tilla dhe jemi të gatshëm të mbrojmë atdheun tonë të përbashkët nga Bresti deri në Vladivostok.”
Gjatë manovrave, Rusia lëshoi raketën ndërkontinentale hipersonike “Yars”, e aftë të mbajë tre koka bërthamore të pavarura. Raketa përshkoi mbi 5,700 kilometra nga rajoni Arkhangelsk deri në Gadishullin Kamçatka në më pak se 20 minuta.
Stërvitjet kanë ngritur alarmin në Ukrainë dhe në NATO. Presidenti ukrainas Volodymyr Zelenskyy paralajmëroi se Moska mund të jetë duke përgatitur një ofensivë të re nga territori bjellorus drejt veriut të Ukrainës dhe Kievit.
Megjithatë, analistët ushtarakë vlerësojnë se forcat ruse të dislokuara aktualisht në Bjellorusi nuk janë të mjaftueshme për një sulm të madh tokësor.
Në vitin 2022, Bjellorusia lejoi ushtrinë ruse të përdorte territorin e saj si pikënisje për pushtimin e Ukrainës veriore, përfshirë zonat pranë centralit bërthamor të Çornobilit.
Edhe pse Lukashenko konsiderohet aleati më i afërt i Kremlinit, ai ka tentuar të ruajë një farë autonomie politike nga Moska.
Bjellorusia përfiton energji të lirë dhe mbështetje ekonomike nga Rusia, por Lukashenko ka refuzuar prej vitesh përpjekjet e Putinit për bashkimin formal të dy vendeve në një “shtet union”.
Së fundmi, raportet mes Minskut dhe Shteteve të Bashkuara kanë treguar shenja afrimi. Lukashenko ka tentuar të rifillojë dialogun me Uashingtonin për të lehtësuar sanksionet ekonomike që kanë goditur rëndë ekonominë bjelloruse.
Sekretari i Përgjithshëm i NATO-s, Mark Rutte, paralajmëroi se çdo përdorim i armëve bërthamore nga Rusia kundër Ukrainës do të sillte një “përgjigje shkatërruese” nga aleanca.
Deklarata erdhi në prag të samitit të ministrave të Jashtëm të NATO-s në Helsingborg, një takim që po zhvillohet në një klimë tensioni të lartë mes Perëndimit dhe Moskës.
Read more:Irani dhe SHBA-ja fajësojnë njëra-tjetrën për sulmet – çfarë ndodhi në realitet
Pavarësisht retorikës së fortë dhe demonstrimit të forcës ushtarake, disa analistë besojnë se stërvitjet janë kryesisht një formë presioni psikologjik ndaj Perëndimit.
Sipas ekspertëve, Lukashenko mbetet i kujdesshëm për t’u përfshirë drejtpërdrejt në luftën në Ukrainë, pasi një hap i tillë mund të destabilizonte vetë regjimin e tij.
“Ekziston rreziku, por Lukashenko ka frikë të futet realisht në luftë”, vlerësojnë analistët politikë në Kiev.
