Një ngjarje e rëndë kriminale, e fshehur për më shumë se një muaj, është zbardhur nga Policia e Lezhës në fshatin Fushë-Mamurras të Kurbinit.
Në kuadër të operacionit të koduar “Enigma”, uniformat blu kane ndaluar 57-vjeçaren Violeta Shpani, e dyshuar për vrasjen e nënës së saj, 85-vjeçares Dave Shpani. Sipas hetimeve, e moshuara kishte ndërruar jetë më 30 prill të këtij viti dhe rasti ishte paraqitur si vdekje natyrale, pa u raportuar në Policinë e Shtetit.
Por informacionet e siguruara në rrugë operative ngritën dyshime për një ngjarje kriminale, duke bërë që të ngrihej një grup i posaçëm hetimor në bashkëpunim me Prokurorinë. Nga veprimet hetimore ka rezultuar se 85-vjeçarja ka humbur jetën si pasojë e goditjeve me mjet prerës, ndërsa autore e dyshuar është vajza e saj, me të cilën jetonte në të njëjtën banesë. Sipas Policisë, 57-vjeçarja vuante edhe nga probleme të shëndetit mendor.
Gjatë hetimeve është sekuestruar thika e dyshuar e përdorur në krim, si dhe prova të tjera materiale që lidhen me ngjarjen. Ndërkohë, procedim penal në gjendje të lirë është nisur edhe ndaj mjekes Anila Lleshi, e cila dyshohet se ka plotësuar aktin e vdekjes duke e cilësuar atë si natyrale dhe pa e referuar rastin pranë organeve ligjzbatuese.
Policia dhe Prokuroria vijojnë hetimet për zbardhjen e plotë të rrethanave të kësaj ngjarjeje të rëndë familjare
Kurbin/Finalizohet operacioni policor i koduar “Enigma”.
Zbardhet një ngjarje kriminale, vrasje në familje, e ndodhur në fshatin Fushë Mamurras, Kurbin.
Dyshohet se ka vrarë nënën e saj me mjet prerës (thikë), vihet në pranga 57-vjeçarja.
Procedohet penalisht edhe një shtetase (mjeke), e cila ka plotësuar aktin si vdekje natyrale dhe nuk ka raportuar në Polici rastin.
Drejtoria Vendore e Policisë Lezhë siguroi të dhëna në rrugë operative se në fshatin Fushë Mamurras kishte ndërruar jetë një 85-vjeçare më datë 30.04.2026, duke u pretenduar vdekje natyrale dhe pa u raportuar në Polici.
Nga të dhënat e siguruara nga Policia lindën dyshime të arsyeshme për një ngjarje kriminale.
Bazuar në informacionet e siguruara, Drejtoria Vendore e Policisë Lezhë ngriti menjëherë një grup të posaçëm hetimor, i cili në bashkëpunim me Prokurorinë nisi menjëherë veprimet verifikuese dhe hetimore në lidhje me rastin.
Nga tërësia e veprimeve hetimore dhe procedurale ka rezultuar se shtetasja D. Sh., 85 vjeçe, ka humbur jetën si pasojë e goditjeve me mjet prerës (thikë), ndërsa si autore e dyshuar e ngjarjes rezulton vajza e saj, shtetasja V. Sh., e cila jetonte në të njëjtën banesë me viktimën dhe vuante nga probleme të shëndetit mendor.
Në vijim të veprimeve, u bë ndalimi i shtetases V. Sh., 57 vjeçe, banuese në Fushë-Mamurras, e dyshuar si autore e veprës penale “Vrasje për shkak të marrëdhënieve familjare”.
Read more:Minatorët e AlbChrome në Bulqizë bojkotojnë punën, kundërshtojnë heqjen e pagës së 13-të
Në cilësinë e provës materiale është sekuestruar mjeti prerës (thikë), si dhe prova të tjera që lidhen me ngjarjen.
Gjithashtu, janë referuar materialet procedurale në gjendje të lirë për shtetasen A. Ll., mjeke, për veprën penale “Shpërdorim detyre”, e cila ka plotësuar aktin e vdekjes, duke e cilësuar si vdekje natyrale dhe duke mos e raportuar në Polici vdekjen e 85-vjeçares.
Në bashkëpunim me Prokurorin vijon puna për dokumentimin e plotë ligjor të ngjarjes dhe, nëse ka persona të tjerë të përfshirë, për identifikimin dhe vënien e tyre përpara përgjegjësisë ligjore.
