Një diplomat amerikan është gjetur i vdekur në qytetin më të madh të Mianmarit, Yangon, me autoritetet lokale që po e trajtojnë ngjarjen si vrasje.
Departamenti i Shtetit konfirmoi “vdekjen e një punonjësi të qeverisë amerikane”, i cili ishte i stacionuar në ambasadën amerikane në Yangon, por nuk dha detaje të tjera mbi rrethanat e ngjarjes.
Sipas Associated Press, duke cituar tre burime nga komuniteti diplomatik në Mianmar që folën në kushte anonimiteti, trupi i pajetë i diplomatit u gjet në Sakura Residence. Objekti ku ndodhi ngjarja ofron qira afatgjata dhe frekuentohet shpesh nga diplomatë, biznesmenë dhe të huaj, duke qenë rreth 1.5 kilometra larg ambasadës amerikane.
Ndërkohë, burime nga komuniteti diplomatik në Yangon bëjnë të ditur se një shtetase tajlandeze është ndaluar nga policia në kuadër të hetimeve që po zhvillohen për zbardhjen e rastit.
Mianmari ndodhet prej vitesh në një situatë të tensionuar politike dhe të pasigurt, pas grushtit të shtetit të vitit 2021 që rrëzoi qeverinë e zgjedhur të Aung San Suu Kyi, duke nxitur përplasje mes ushtrisë, milicive etnike dhe forcave pro-demokracisë.
Autoritetet në vend zakonisht japin pak informacion për mediat, duke e mbajtur të kufizuar komunikimin zyrtar për raste të tilla, kujton AP.
