India ka akuzuar Shtetet e Bashkuara për sulmin ndaj anijes tregtare MT Jalveer pranë portit Shinas të Omanit, duke e cilësuar incidentin si sulmin e tretë brenda pak ditësh ndaj anijeve që transportonin marinarë indianë. Sipas autoriteteve indiane, në bord ndodheshin 20 marinarë indianë, të cilët raportohen të jenë të gjithë të sigurt, ndërsa operacioni i evakuimit vijon.
Ministria e Punëve të Jashtme e Indisë deklaroi gjatë një konference për shtyp në New Delhi se sulmet ndaj anijeve Settebello, Marivex dhe Jalveer kanë ardhur nga Marina Amerikane.
Ndërkohë, Komanda Qendrore e SHBA-së (CENTCOM) ka konfirmuar operacionet ndaj Settebello dhe Marivex, por deri tani nuk ka komentuar zyrtarisht mbi incidentin e raportuar me Jalveer.
Sipas qeverisë indiane, situata e sigurisë në rajonin e Gjirit po bëhet gjithnjë e më shqetësuese. Autoritetet kanë bërë të ditur se 13 anije me flamur indian dhe mbi 18 mijë marinarë indianë ndodhen ende në zonë, ndërsa 562 prej tyre janë në anije me flamur indian.
Tensionet janë rritur pas incidenteve të mëparshme që përfshinë anijet Settebello dhe Marivex. Në rastin e Settebello, India protestoi zyrtarisht ndaj SHBA-së pasi sulmi la viktima dhe persona të zhdukur mes ekuipazhit indian. Autoritetet indiane konfirmuan më vonë vdekjen e tre marinarëve indianë pas incidentit.
Read more:Sondazhi shokues, The Guardian: Vetëm një në 10 europianë e shohin SHBA-në si aleate
Ngjarjet e fundit ndodhin në një periudhë tensionesh të larta në Gjirin e Omanit dhe ngushticën e Hormuzit, ku siguria e lundrimit tregtar është vënë në pikëpyetje për shkak të përshkallëzimit të konfliktit rajonal. India ka kërkuar garantimin e sigurisë së marinarëve dhe të lundrimit ndërkombëtar në zonë.
