Maturantët do t’i rikthehen sot bankave të shkollës për të zhvilluar provimin e lëndëve me zgjedhje, duke përmbyllur ciklin e testimeve të Maturës Shtetërore 2026. Rezultatet e këtij provimi do të shërbejnë si bazë për aplikimet dhe pranimin në institucionet e arsimit të lartë.
Sezoni i provimeve të detyruara nisi më 2 qershor me testin e Gjuhës së Huaj, vijoi më 9 qershor me Gjuhën Shqipe dhe Letërsinë, ndërsa më 16 qershor maturantët iu nënshtruan provimit të Matematikës.
Matura Shtetërore 2026 po administrohet në 144 qendra provimesh në të gjithë vendin, me angazhimin e mbi 2000 mësuesve administratorë dhe 170 monitoruesve të Ministrisë së Arsimit.
Read more:“Negociata me tradhtar nuk ka!”, protestuesi: Zgjedhje të parakohshme? E vendos sovrani!
Në prag të provimit të fundit, ministrja e Arsimit, Mirela Kumbaro, u bëri thirrje maturantëve të respektojnë rregulloren e provimeve, duke kujtuar se përdorimi i telefonave celularë dhe pajisjeve të tjera inteligjente është rreptësisht i ndaluar në ambientet e testimit.
Përmes një mesazhi në rrjetet sociale, ministrja shprehu keqardhjen për 29 maturantë që janë përjashtuar nga provimet e Maturës Shtetërore gjatë tre testimeve të para për shkak të shkeljes së rregullores.
“Keqardhje për 29 maturantë që janë përjashtuar gjatë tre provimeve të para për shkelje të rregullores, duke humbur mundësinë për të vijuar provimet e Maturës Shtetërore dhe duke vënë në rrezik regjistrimin në universitet për këtë vit akademik, por respektimi i rregullave është tepër i rëndësishëm dhe i panegociueshëm”, u shpreh Kumbaro.
Ajo theksoi se respektimi i rregullave, qetësia dhe përqendrimi mbeten faktorët kryesorë për arritjen e rezultateve sa më të mira.
