Administrata Doganore vijon të shënojë rezultate pozitive, duke përmirësuar ndjeshëm performancën financiare dhe cilësinë e shërbimeve ndaj biznesit dhe qytetarëve.
Gjatë periudhës mars-maj 2026, të ardhurat arritën në 62.1 miliardë lekë, ose 102% e planit, ndërsa krahasuar me të njëjtën periudhë të vitit të kaluar u mblodhën rreth 3 miliardë lekë më shumë, me një rritje prej 5.2%.
Edhe performanca mujore ka qenë në rritje të vazhdueshme. Në mars realizimi ishte 103.2 për qind i planit, në prill 105.8 për qind, ndërsa në maj arriti në 106.4 për qind, duke reflektuar një ecuri të qëndrueshme gjatë gjithë periudhës.
Read more:Amnistia drejt miratimit, qeveria përgatit ndryshime, më shumë të dënuar pritet të përfitojnë
Këto rezultate janë arritur pavarësisht ndikimit negativ të kursit të këmbimit, i cili uli potencialisht të ardhurat me rreth 1.8 miliardë lekë. Sipas të dhënave, pa këtë efekt, realizimi do të ishte 104.8% e planit, ose afro 4.8 miliardë lekë më shumë se në të njëjtën periudhë të vitit 2025.
Rritje është shënuar edhe në zhdoganimin e mallrave të akcizës. Vetëm për karburantet janë zhdoganuar 168,749 ton, ose rreth 36 mijë ton më shumë se në të njëjtën periudhë të vitit 2022. Ndërkohë, zhdoganimi i cigareve arriti në 802 njësi matëse, niveli më i lartë i viteve të fundit, ndërsa importi i kafesë u rrit në 2,105 njësi, duke shënuar gjithashtu rekord për periudhën mars-maj. Këta tregues reflektojnë rritjen e aktivitetit ekonomik dhe një administrim më efikas të procedurave doganore.
Read more:Bie klima e biznesit, AMCHA: Korrupsioni, burokracia dhe mungesa e stafit frenojnë investimet
Paralelisht me rritjen e të ardhurave, Administrata Doganore ka përmirësuar edhe shërbimin ndaj operatorëve ekonomikë dhe qytetarëve, përmes thjeshtimit të procedurave dhe uljes së kohës së përpunimit, duke e bërë performancën pozitive të reflektohet jo vetëm në shifra, por edhe në cilësinë e shërbimit. Një kombinim që synon të garantojë jo vetëm më shumë të ardhura për buxhetin e shtetit, por edhe një administratë më moderne, më efikase dhe më pranë nevojave të sipërmarrjes.
