Urbanizimi ka transformuar ndjeshëm mënyrën se si jetojnë shoqëritë në mbarë botën. Në dekadat e fundit, zhvillimi ekonomik, industrializimi dhe përqendrimi i mundësive të punësimit, arsimit dhe shërbimeve në qytete kanë nxitur zhvendosjen e vazhdueshme të popullsisë nga zonat rurale drejt qendrave urbane. Si pasojë, vendet ku shumica e banorëve jetojnë ende në fshat janë bërë gjithnjë e më të rralla.
Sipas një analize të Visual Capitalist, bazuar në të dhënat e Bankës Botërore, vetëm 60 vende në botë kanë ende më shumë se gjysmën e popullsisë që jeton në zona rurale. Pjesa më e madhe e tyre ndodhen në Afrikën Sub-Sahariane, ndërsa një numër më i vogël gjendet në Azinë Jugore, Azinë Juglindore, Oqeani dhe rajonin e Karaibeve.
Për Shqipërinë, të dhënat tregojnë se 34.62% e popullsisë jeton në zona rurale, ndërsa pjesa tjetër është e përqendruar në qytete. Ky nivel e rendit vendin ndër më të urbanizuarit në rajon.
Krahasuar me vendet fqinje, Bosnja dhe Hercegovina ka përqindjen më të lartë të popullsisë rurale, me 49.2%, e ndjekur nga Serbia me 42.6%. Në Maqedoninë e Veriut, afro 40% e banorëve jetojnë në zona rurale. Shqipëria renditet e parafundit në këtë krahasim rajonal, ndërsa vendin e fundit e mban Mali i Zi, ku vetëm 31.16% e popullsisë jeton jashtë zonave urbane.
Në shkallë globale, Afrika dominon renditjen e vendeve me popullsinë më rurale. Burundi, Malavi, Nigeri dhe Sudani i Jugut janë ndër shtetet ku pjesa më e madhe e banorëve vazhdon të jetojë në fshat.
Sipas Our World in Data, urbanizimi ka qenë një nga ndryshimet më të rëndësishme demografike të shekullit të kaluar. Në vitin 1960, rreth dy të tretat e popullsisë së botës jetonin në zona rurale. Sot kjo përqindje ka rënë në rreth 43%, ndërsa popullsia urbane përbën tashmë shumicën e banorëve të planetit.
Read more:Christian Schmidt jep dorëheqjen nga posti i Përfaqësuesit të Lartë në BeH
Ky transformim ka qenë veçanërisht i shpejtë në Azinë Lindore, Amerikën Latine dhe Lindjen e Mesme, ku zgjerimi ekonomik dhe zhvillimi i qyteteve kanë përshpejtuar migrimin e brendshëm. Parashikimet tregojnë se edhe në dekadat e ardhshme rritja e popullsisë globale do të përqendrohet kryesisht në zonat urbane, me qytetet që do të vazhdojnë të tërheqin pjesën më të madhe të banorëve të rinj./ SCAN
