Politologu Afrim Krasniqi ka komentuar mbledhjen e drejtuesve politikë të Partisë Socialiste në Pogradec, të thirrur nga kryeministri Edi Rama, duke e cilësuar atë si një takim rutinë partie, por që sipas tij vjen në një moment të veçantë për shkak të protestave të vazhdueshme. Krasniqi thekson se protesta nuk ka në themel kërkesën për mënyrën se si PS-ja duhet të qëndrojë në pushtet, por kërkesën për një Shqipëri me demokraci funksionale dhe shtet të së drejtës. Sipas tij, në periudha krizash dhe zhgënjimesh të mëdha rrallëherë interesi i një partie për të ruajtur pushtetin përputhet me interesin e vendit, ndërsa në rastin konkret ai vlerëson se kjo përputhje është e dukshme.
Duke iu referuar takimit të PS-së, Krasniqi ngre disa pikëpyetje. Së pari, ai kërkon transparencë mbi financimin dhe organizimin e mbledhjes, duke pyetur nëse takimi është zhvilluar në një hotel privat apo në një vilë qeveritare dhe kush ka paguar ambientin, shërbimet, personelin, automjetet dhe angazhimin e numrit të madh të gardistëve. Sipas tij, nëse takimi është financuar nga Partia Socialiste, kjo duhet të bëhet publike. Në të kundërt, ai ngre shqetësimin se financimi nga fondet apo strukturat qeveritare mund të përbëjë shkelje ligjore.
Një tjetër çështje e ngritur nga analisti lidhet me përdorimin e simboleve shtetërore gjatë një aktiviteti partiak. Ai argumenton se një mbledhje e një partie politike nuk duhet të ketë në tavolinë simbolin shtetëror të Kryeministrisë, pasi kjo, sipas tij, krijon përshtypjen e njësimit të shtetit me partinë. Krasniqi e konsideron këtë veçanërisht problematike në prag të zgjedhjeve të ardhshme politike, pasi sipas tij kufiri mes strukturave partiake dhe institucioneve shtetërore duhet të jetë i qartë. Ai ndalet edhe te retorika për reformimin, transparencën dhe luftën kundër korrupsionit, duke argumentuar se këto deklarata duhet të shoqërohen me veprime konkrete. Në këtë kuadër, ai përmend rastin e ish-zëvendëskryeministres Belinda Balluku, ku SPAK kërkoi heqjen e imunitetit nga parlamenti, ku maxhoranca votoi kundër.
REAGIMI I KRASNIQIT
Kryeministri ka mbledhur drejtuesit politikë të partisë së tij në një mbledhje rutinë në Pogradec. Është e drejta e tij dhe e tyre. Mbledhja vjen si përgjigje ndaj protestave. Natyrisht protestat nuk kanë kërkesë sesi të mbetet PS në pushtet, por sesi të bëhet Shqipëria një demokraci funksionale e shtet i së drejtës. Rrallë ndodh që në kohë krizash e zhgënjimesh të mëdha interesi dhe nevojat e një partie për të qëndruar në pushtet përputhet me interesin dhe nevojat e vendit. I tillë është edhe ky rast. U përdor retorikë nevoja për reformim, për një qeverisje ndryshe, më transparente, më europiane, më antikorrupsion, etj, etj, por de facto, disa detaje ia vlejnë të konsiderohen edhe kur media “nuk i sheh”:
E para, mbledhje partie në hotel privat / takime në vilë qeveritare? Pyetja është: kush paguan për mjedisin, shërbimin, personelin, automjetet dhe numrin e madh të gardistëve? PS duhej të deklaronte se është financuese e takimit, ndryshe, financimi nga qeveria përbën shkelje ligji.
E dyta, një mbledhje partie nuk mund të ketë në tavolinë simbolin shtetëror të kryeministrisë; dukshëm kemi të bëjmë me keqpërdorim të simboleve shtetërore, njësim i shtetit me partinë dhe ky është edhe një sinjal negativ në prag të zgjedhjeve të ardhshme politike.
E treta, çdo retorikë antikorrupsion ka sens kur shoqërohet me akte antikorrupsion. Një zyrtare e akuzuar nga drejtësia dhe e kërkuar nga SPAK për heqje imuniteti vijon të jetë vendimmarrëse në ekzekutiv, parlament dhe parti, duke u imponuar si qasje reformatore / BESA.
E fundit, lajmi kryesor i takimit dje ishte porosia për shkarkimi/lëvizja nga pozita e drejtorëve në administratë. Në një vend ku ka ligje dhe Kushtetutë dhe ku shteti është i ndarë nga partia nuk mundet kurrsesi një parti të vendosë shkarkime administrative. Në Shqipëri po.
Sot janë ministrat. Do japin llogari para partisë. Fillimisht partia pastaj ministrat. E kemi traditë, dikur mblidhej Byroja pastaj Plenumi dhe në fund qeveria e Presidiumi i Kuvendit.
