Gazetari Osman Stafa, i ftuar në studion e News24, ka komentuar valën e protestave që po vijojnë prej 86 ditësh në kryeqytet me kërkesën për dorëheqjen e kryeministrit Edi Rama. Stafa e cilësoi këtë qëndresë verore si një lëvizje “heroike dhe historike”, e cila po udhëhiqet nga vetë hallet e qytetarëve dhe jo nga interesat e partive politike.
Gjatë bisedës në studio, Stafa nënvizoi se prej 36 vitesh jeta politike në Shqipëri ka mbetur e mbizotëruar nga dy të njëjtat figura, Sali Berisha dhe Edi Rama. Sipas tij, vendi ka nevojë për një energji të re, pasi modeli aktual ka dështuar t’u ofrojë perspektivë të rinjve dhe dinjitet pensionistëve. Ai solli si shembull vështirësitë e moshës së tretë, duke treguar se praktika e marrjes së mallrave me listë tashmë ka kaluar nga ushqimoret te farmacitë, për shkak të pensioneve minimale prej 100 deri 150 mijë lekësh.
Gazetari theksoi se lëvizja popullore ka krijuar presion te pushteti, duke e cilësuar nismën e fundit të qeverisë, dokumentin “Besa”, si një pjellë të frikës nga kjo protestë. Ai renditi një sërë premtimesh të mbajtura peng ndër vite, nga uji i pijshëm dhe legalizimet, te shëndetësia, arsimi, shpopullimi dhe infrastruktura që dëmtohet që me shirat e parë.
I pyetur mbi mungesën e një lideri zyrtar në krye të tubimeve, Stafa u shpreh se organizatori kryesor i kësaj lëvizjeje është vetë korrupsioni dhe hallet e përditshme të njerëzve. Ai u bëri thirrje qytetarëve që të mos e trajtojnë politikën si tifozllëk sportiv, por të ndërgjegjësohen për kushtet e tyre të jetesës, duke theksuar se fokusi kryesor i kësaj proteste mbetet i bashkuar rreth kërkesës për dorëheqjen e kryeministrit.
