Deputeti i Partisë “Mundësia”, Erald Kapri, ngriti në Komisionin për Nismat Qytetare çështjen e banorëve të Rrjollit, të cilët kundërshtojnë ndërtimin e një resorti nga ndërtuesi dhe botuesi Bashkim Ulaj, duke pretenduar se u janë tjetërsuar pronat.
Gjatë seancës, Kapri iu drejtua kreut të SPAK, Klodian Braho, duke kërkuar sqarime se përse nuk janë nisur hetime për këtë rast, të cilin e krahasoi me çështjen e Zvërnecit.
Erald Kapri:Kam një kërkesë nga banorët e Rrjollit. Dosja e tyre është si ajo e Zvërnecit. Pse nuk keni nisur hetimet?
Në përgjigje, drejtuesi i SPAK, Klodian Braho, shmangu komentet për raste konkrete, duke theksuar se nisja e hetimeve bazohet në kriteret ligjore dhe jo në kërkesat e palëve.
Klodian Braho:Nuk dua të ndalem në raste konkrete. Kompetencat e institucionit nuk përcaktohen nga dëshira apo vullneti i kallëzuesve, por nga rrethanat faktike. Nëse personat e caktuar nuk janë dakord, ata kanë të drejtën të ndjekin rrugët ligjore që parashikon ligji.
