“Jam kërcënuar me jetë nga një civil”, kështu ka deklaruar eksperti i IT Gentian Progni në një komunikim për mediat. Denoncimi i tij vjen në protestën e 58, ndërsa ndodhej para ambienteve të komisariatit 1 ku edhe u zhvendos protesta.
Prongi shtoi se e ka të dokumentuar ngjarjen dhe paralajmëroi se do të bëjë edhe një kallëzim për ngjarjen.
“Dua të bëj një kallëzim publik, jam kanosur sot me jetë nga një person civil që e kam edhe me foto. Ka nxjerrë thikën dhe ka tentuar të më godasë. Besoj shumë që është polic civil. Isha duke filmuar policë civilë që po rrinin në një lokal përballë Toptatin, personi u çua dhe më tha përse filmon dhe nxori një thikë nga xhepi nga këto që hapet. Tentoi të më godiste. Kanë ardhur disa civilë atje dhe thanë mos godisni policët. Do bëj kallëzim në prokurori dhe këtu për kanosje dhe në AMP. E kam me foto personin. Momentin që u bë rrëmujë thërrisnin që është polic”, tha ai.
Ndërkohë aktivisti Edison Lika, ka deklaruar se me veprimin e ndërmarrë sot ndaj Prognit, është kaluar vija e kuqe. Sipas tij akti i sotëm është kalim nga kërcënimet me fjalë në veprime konkrete, por ka deklaruar se protestuesit nuk tremben dhe se do të vijojnë tubimet deri në largimin e kryeministrit Edi Rama.
“Duket se limiti është kaluar, sot për herë të parë pas gjithë kërcënimeve që kemi pasur nga policë civilë, nxjerrja e thikës ndaj një protestuesi që ka qenë këtu nga dita 1 është kalim i vijave të kuqe. Ne nuk trembemi, do të na keni përballë. Nuk trembemi dhe do të jemi në krah të çdo protestuesi të kërcënuar, aq më shumë kur vjen nga policia. Nxjerrja e thikës ndaj Gentit është ndaj të gjithëve ne. Ne nuk intimidohemi, do të jemi këtu deri në largimin e Ramës”, tha ai.
