Kryetari i Grupit Parlamentar të Partisë Demokratike, Gazment Bardhi, ka reaguar ndaj deklaratave të Ministrit të Mbrojtjes, i cili e cilësoi të papranueshëm dërgimin në Gjykatën Kushtetuese të ligjit për ratifikimin e marrëveshjes së huasë prej 302 milionë dollarësh.
Përmes një postimi në Facebook, Bardhi argumentoi se e papranueshme nuk është shqyrtimi i marrëveshjes nga Gjykata Kushtetuese, por, sipas tij, mënyra se si është miratuar ajo, duke akuzuar qeverinë për shkelje të Kushtetutës dhe të procedurave parlamentare.
Sipas Bardhit, deputetët janë detyruar të votojnë pa u njohur me tekstin e plotë të marrëveshjes, ndërsa Këshilli i Ministrave ka pasur një muaj kohë për shqyrtimin e saj, në një kohë që Kuvendit i janë lënë vetëm katër orë për miratim.
Ai kritikoi gjithashtu faktin që, sipas tij, Presidentit të Republikës iu dhanë vetëm 30 minuta për të vlerësuar dhe dhënë pëlqimin për hyrjen në fuqi të marrëveshjes, duke e cilësuar këtë një cenim të rolit kushtetues të kreut të shtetit.
Në reagimin e tij, Bardhi akuzoi qeverinë edhe për mënyrën e menaxhimit të financave publike, duke deklaruar se janë shpenzuar miliona euro për inceneratorë që, sipas tij, nuk ekzistojnë, ndërsa për financimin e sigurisë kombëtare vendi detyrohet të marrë hua.
“E papranueshme është ta trajtosh një marrëveshje strategjike me aleatin tonë strategjik sikur të ishte një urdhër i brendshëm i Ministrit të Mbrojtjes”, shkruan Bardhi.
Në përfundim të reagimit, kreu i grupit parlamentar demokrat thekson se “nuk ka gjë më të pranueshme në një vend demokratik sesa mbrojtja e Kushtetutës”, duke mbrojtur vendimin për ta dërguar marrëveshjen për shqyrtim në Gjykatën Kushtetuese.
REAGIMI:
Ministri i Mbrojtjes paska konsideruar të papranueshëm dërgimin për shqyrtim në Gjykatën Kushtetuese të ligjit për ratifikimin e marrëveshjes së huasë prej 302 milionë dollarësh.
Dikush duhet t’i shpjegojë se:
E papranueshme është të shpërfillësh hapur Kushtetutën e vendit tënd dhe vendimet e Gjykatës Kushtetuese.
E papranueshme është që deputetët të votojnë pa u njohur me tekstin e marrëveshjes, me të cilën Shqipëria merr një hua prej 302 milionë dollarësh.
E papranueshme është që Këshilli i Ministrave të marrë një muaj kohë për shqyrtim, ndërsa Kuvendit të Shqipërisë t’i jepen vetëm katër orë për miratim.
E papranueshme është të çosh miliona euro të shqiptarëve për tre inceneratorë që nuk ekzistojnë, ndërsa për të garantuar sigurinë kombëtare të marrësh borxh, sepse nuk arrin ta financosh atë me fondet e Buxhetit të Shtetit.
E papranueshme është ta trajtosh një marrëveshje strategjike me aleatin tonë strategjik sikur të ishte një urdhër i brendshëm i Ministrit të Mbrojtjes.
E papranueshme është që Presidentit të Republikës t’i jepen vetëm 30 minuta për të vlerësuar dhënien e pëlqimit për hyrjen në fuqi të një marrëveshjeje huaje dhe që ai, brenda po këtyre 30 minutave, të japë pëlqimin pa e lexuar, pa e analizuar dhe pa përmbushur rolin e tij kushtetues të kontrollit dhe balancës ndërmjet pushteteve.
E papranueshme është t’i trajtosh të gjitha institucionet, përfshirë Kuvendin e Shqipërisë, si anekse të Qeverisë.
Mbi të gjitha, nuk ka gjë më të pranueshme në një vend demokratik sesa mbrojtja e Kushtetutës.
