Protesta qytetare në Tiranë, që ka hyrë në ditën e saj të 62-të, u shoqërua edhe këtë mbrëmje me pankarta, parulla dhe thirrje të protestuesve.
Pak çaste para nisjes së marshimit, organizatorët vendosën edhe mesazhin simbolik të mbrëmjes në pllakat e bulevardit, një element që tashmë është kthyer në traditë në çdo tubim. Këtë herë, mesazhi ishte: “Me Bashkitë”.
Përmes këtij slogani, protestuesit shprehën mbështetjen për qytetarët që kundërshtojnë draftin e reformës territoriale të propozuar nga Partia Socialiste, i cili parashikon shkrirjen e 15 bashkive.
