Gjashtë të rinj italianë që ndodheshin për pushime në Shqipëri, janë dhunuar në Tiranë. Sipas rrëfimit të tyre për mediat italiane, ngjarja ka ndodhur më 29 korrik dhe ata janë rrahur nga një grup prej rreth 20 të rinjsh të moshave 16-18 vjeç.
Italianët ndodheshin pranë sheshit “Skënderbej” kur janë ndjekur nga grupi i shqiptarëve që u hidhnin ujë, shishe e gurë. Më pas ata kanë rrethuar njërin prej tyre dhe kërkuar para duke e kërcënuar me thikë duke i kërkuar para. Djemtë kanë vrapuar, përveç njërit që mbeti pas dhe përjetoi gjithë dhunën brutale të agresorëvve.
Italianët thonë se fillimisht disa efektivë nuk i ndihmuan dhe i injoruan plotësisht, por ishin një grup tjetër policësh që iu gjendën pranë. Të nesërmen, ata vendosën që gjëja e parë që do të bënin, ishte të ktheheshin sërish në shtëpi.
Artikulli i plotë:
Pushime vështirë për t’u harruar për gjashtë të rinj rreth të njëzetave nga Venosa (Potenza), të cilët, pas përfundimit të provimeve universitare, vendosën të kalonin disa ditë relaksi në Shqipëri. Megjithatë, pushimet zgjatën më pak se një ditë.
Ngjarjen e rrëfen njëri prej tyre:
“Mbërritëm në Shqipëri, në Tiranë, më 29 korrik. Po atë mbrëmje, rreth orës 21:30, pasi bëmë dush, dolëm nga apartamenti që kishim marrë me qira për të shkuar për darkë. Ishim gjashtë veta. Sapo dolëm në rrugë, njëri prej nesh hyri në një dyqan të vogël për të blerë një shishe ujë. Në atë moment u afrua një grup djemsh vendas dhe na pyeti nga vinim. Ne iu përgjigjëm thjesht se ishim italianë.
Filluam të ecnim drejt sheshit ‘Skënderbej’, sheshi kryesor i qytetit, kur ky grup – rreth 20 të rinj shumë të rinj në moshë, mes 16 dhe 18 vjeç – nisi të na ndiqte. Filluan të na hidhnin ujë, shishe, madje edhe gurë. Fillimisht u përpoqëm t’i injoronim dhe të vazhdonim rrugën, si sepse sapo kishim mbërritur – ishte mbrëmja jonë e parë e pushimeve – ashtu edhe sepse ndodheshim në një vend të huaj dhe donim të shmangnim çdo problem.”
“Situata u përkeqësua papritur,” – tregon i riu nga Venosa. “Ata rrethuan njërin prej nesh dhe i kërkuan para, duke e kërcënuar drejtpërdrejt me thikë. Në atë moment njerëzit që ndodheshin aty pranë nisën të vraponin drejt policëve që ndodheshin në zonë, ndërsa ky grup vazhdonte të na ndiqte, duke na goditur me gurë dhe duke rrahur me grushte e shkopinj ata prej nesh që kishin mbetur pas.
Pothuajse të gjithë arritën të shpëtonin, përveç njërit: e bllokuan, e goditën me grushte, e rrëzuan përtokë dhe vazhduan ta rrihnin edhe ndërsa ishte i shtrirë.”
Por sipas tyre, kishte edhe më shumë.
“Një gjë e pabesueshme dhe shumë e rëndë ishte qëndrimi i efektivëve të parë të policisë/inspektorëve në vendngjarje. Disa prej nesh u kërkuan ndihmë me dëshpërim, por ata bënë sikur nuk panë asgjë. I kërkuam një kalimtareje numrin e emergjencës së policisë lokale për të thirrur ndihmë, por nuk morëm asnjë përgjigje. Fatmirësisht, më pas ndërhynë policë të tjerë, të cilët arritën t’i largonin agresorët dhe thirrën një ambulancë. Njëri prej nesh pësoi disa plagë dhe dëmtime në pjesë të ndryshme të trupit dhe mori ndihmën e parë në vend.”
Në atë moment, të rinjtë vendosën të ktheheshin në Itali dhe nisën të kërkonin një fluturim.
“Menduam për shokun tonë të plagosur dhe se do të ishte më mirë ta dërgonim në spital në Venosa. Kështu, në orën 06:00 të mëngjesit të 30 korrikut, hipëm në fluturimin e parë të disponueshëm dhe u kthyem në shtëpi. Pasi mbërritëm në Venosa, djali që ishte lënduar më rëndë u vizitua dhe mori trajtim në spital.
‘Më mirë të rrihesh sesa të reagosh dhe të rrezikosh të goditesh me thikë, gjë që mund të kishte pasoja fatale,’” – përfundon i riu.
6 italianët e dhunuar në Tiranë, policia: U ndihmuan nga Policia Bashkiake, njëri prej tyre ishte konfliktuar me një grup të miturish
Policia e Tiranës ka reaguar lidhur me lajmin duke marrë shkas nga videot e shpërndara në rrjetet sociale dhe shpjegon se ngjarja ka ndodhur pas Pallatit të Kulturës. Atje policia ka gjetur një prej italianëve të lënduar lehtë si dhe dy prej shokëve të tij. Fillimisht, atyre u ishte ofruar ndihmë nga Policia Bashkiake dhe më pas djali është dërguar në spital.
Italiani është larguar me dëshirë pa përfunduar ekzaminimet mjekësore, ndërsa as ai dhe as dy të tjerët nuk kanë bërë kallëzim në polici.
Nga pamjet e kamerave, ka rezultuar se i lënduari ishte konfliktuar me një grup të miturish.
Njoftimi i plotë:
Në lidhje me një video të publikuar, ku shfaqet një shtetas italian i dëmtuar lehtë, sqarojmë se ngjarja ka ndodhur rreth orës 22:00, më datë 29.07.2026, në zonën pas Pallatit të Kulturës, dhe është trajtuar menjëherë nga Policia për veprën penale “Plagosja e lehtë me dashje”.
Konkretisht, shërbimet e Komisariatit të Policisë Nr. 1, pas njoftimit të marrë nga Salla Operative për një konflikt, kanë shkuar menjëherë në vendngjarje, ku kanë konstatuar shtetasin italian G. M., me dëmtime të lehta sipërfaqësore. Në vendngjarje ndodheshin edhe dy shokët e tij, të cilët e shoqëronin. Shtetasi italian ishte ndihmuar fillimisht nga punonjës të Policisë Bashkiake, të cilët ndodheshin në afërsi.
Më pas, shtetasi është transportuar për të marrë ndihmë mjekësore. Sipas deklarimeve të personelit mjekësor dhe këqyrjes së kartelës mjekësore, ai ka qenë i vetëdijshëm, jashtë rrezikut për jetën dhe me dëmtime të lehta sipërfaqësore në gjymtyrë. Pas marrjes së ndihmës së parë, ai është larguar me dëshirën e tij, pa përfunduar ekzaminimet mjekësore dhe pa njoftuar stafin mjekësor për largimin e tij.
Gjithashtu ky shtetas nuk ka pranuar të bëjë kallzim në lidhjen me konfliktin dhe personat që e kishin dëmtuar.
Edhe dy shtetasit që e shoqëronin nuk kanë dhënë informacion lidhur me rrethanat e konfliktit.
Pavarësisht mungesës së kallëzimit nga shtetasi italian, grupi hetimor ka vijuar veprimet hetimore, duke këqyrur pamjet filmike, nga të cilat ka rezultuar se shtetasi italian ishte përfshirë në një konflikt me një grup të miturish në pjesën e pasme të Pallatit të Kulturës.
Grupi hetimor vijon veprimet për zbardhjen e plotë të rrethanave të ngjarjes, identifikimin e personave të përfshirë dhe dokumentimin e plotë ligjor të rastit.
