Në 25 shkurt të vitit 2017, Mitropoliti i Malit të Zi Amofilohije Radoviq, erdhi në Shkodër dhe deklaroi se Mali i Zi nuk e ka sulmuar Shkodrën në tetor 1912 – prill 1913 por ka luftuar për ta çliruar Shkodrën. Dhe në ketë përpjekje për çlirim, 8 mijë malazezë janë sakrifikuar për Shkodrën. Duke qenë kështu, serbët dhe malazezët kanë lënë gjurmë në historinë e Shkodrës. Gjurmë si çlirimtarë. Kjo sipas Amofilohijes gjithmonë.
Ky peshkop na tha neve se 15, 000 shqiptarë të cilët shkuan vullnetarë prej Dibrës, Matit, Tiranës, Durrësit, Kavajës, Peqinit, Elbasanit, Belshit etj, e të cilët luftuan dhe u vranë në atë rrethim monstruoz serbo-malazez të Shkodrës, na qenkan hiç asgjë; sepse heronjt na qenkan ata 8 mijë malazezët. Pa dyshim, malazezët e serbët donin ta çlironin Shkodrën duke e marrë për vete, duke ia bashkuar Malit të Zi.
Në janar 2018, prifti malazez Radomir Nikçeviq deklaroi po në Shkodër se Kosova është tokë e shenjtë e Serbisë dhe djep i Serbisë.
Jo nongrata kundër deklaratave të Amofilohijes e Nikçeviqit por as notë proteste publike nuk bëri asokohe qeveria e Edi Ramës. Kjo sepse nuk ka qëllim jete as sigurinë, as nderin kombëtar, as i interesojnë vrasjet e mijëra shqiptarëve të cilët janë vrarë duke mbrojtur tokat shqiptare. Zero.
Sot gjen këta shqiptarë të Kosovës e Maqedonisë dhe me këta merret kollaj pasi nongrata ndaj tyre ska pasoja. Ka veç debat në internet. Debati në internet i intereson kur në Francë është arrestuar Ermal Beqiri i tij në kërkim ndërkombëtar me 2.6 milion euro kështjellë të blerë me paratë që vetë Edi Rama ia ka dhënë si tendera. I intereson debati për hoxhallarë e priftërinj kur klientët e pushtetit të tij nxjerrin armët dhe gjuajnë në mes të sezonit turistik në Palasë.
Unë si musliman shqiptar jam kundër të gjithë hoxhallarëve të cilët kanë rrëshkitur dhe dalin deklarojnë se Skendërbeu ka qenë qafir dhe se perandoria osmane ka qenë çlirimtare. Në asnjë kulturë të globit nuk mundet të jetë çlirimtar dikush cili të vjen me shpatë e kërkon të të sundojë. Ata paraardhës tanët të cilët kanë luftuar asokohe për të mbrojtur veten, qoftë edhe me sfurk në paçin luftuar, janë heronj sepse kanë vepruar ashtu siç veprohet kur dikush të sulmon. Disa i thonë xhematit se Skënderbeu ka vrarë musliman. Edhe çfarë?
Nëse sot ta zëmë të sulmon Egjypti apo Turqia a do tua hapësh rrugën sepse janë muslimanë? Jo. Fundja sulltani ka vrarë më shumë muslimanë sesa Skënderbeu sepse ka vrarë duke pushtuar bejllikët e Anadollit, Egjyptin, Sirinë e deri në Jemen. Pra nuk e kanë hallin te vrasja e muslimanëve. E kanë sherr politik. Dhe nuk duhet të merren me sherr politik.
A kanë kryer Bekir Halimi dhe Valon Bela ksi lloj sherri politik? Kjo mësohet krejt lehtë.
Qeveria Rama e ministri i brendshëm i saj duhet të thirren në parlament dhe tiu kërkohen cilat janë provat konkrete pse hoxha Bekir Halimi dhe analisti Valon Bela janë shpallur nongrata për 10 vjet. Nëse ka të dhëna bindëse për veprimtari e cila dëmton interesat kombëtare, le të rrinë nongrata jo 10 por 100 vjet. Nëse nuk ka, nongrata duhet tu anulohet menjëherë.
Interesi ynë kombëtar është që shqiptarët jashtë kufinjve shtetërorë t’i mbajmë afër e jo t’i largojmë e të thyhemi me ta duke iu bërë padrejtësi. Nuk mund të përdoret instrumenti “nongrata” për interesa të Edi Ramës për të shkaktuar debat kur ai ka nevojë.
Të raportohet në parlament dhe të bëhet publike se çfarë veprimi kundër interesave tona kombëtare kanë kryer hoxha dhe analisti. Ta shohim se çfarë konsideron Edi Rama interes kombëtar.
Nëse nuk ka prova bindëse atëherë është Edi Rama i cili po cënon interesin kombëtar duke shkaktuar thyerje e duke dëmtuar unitetin e shqiptarëve për interesat e veta.
