Autoriteti i Mediave Audiovizive (AMA) ka paralajmëruar qytetarët të mos bien pre e një mashtrimi që lidhet me aplikacionin pirat “AlbKanale“, i cili transmetonte pa autorizim paketat e Digitalb dhe Tring, kanalet e TV Klan dhe RTSH, si edhe paketa sportive. Sipas AMA-s, pasi aplikacioni u bllokua dhe doli jashtë funksionit më 11 gusht 2026, administratorët e tij kanë publikuar një njoftim ku pretendojnë se kanë rënë pre e një sulmi kibernetik dhe u kërkojnë përdoruesve të dërgojnë kontribute financiare në formën e kriptomonedhave për rikthimin e shërbimit.
Autoriteti thekson se ky pretendim është i pavërtetë. Sipas AMA-s, “AlbKanale” nuk është ndërprerë për shkak të një sulmi kibernetik, por është bllokuar pas një pune teknike të grupeve të inspektimit, pasi transmetonte përmbajtje të mbrojtura pa të drejta.
Në reagim thuhet se ndërhyrja është realizuar përmes monitorimit dhe analizës së trafikut të rrjetit, gjurmimit të rrjedhës së transmetimit deri te serverat burimorë, si edhe bashkëpunimit me operatorë ndërkombëtarë për raportimin e shkeljeve.
AMA thekson gjithashtu se anonimati në këto shërbime nuk ekziston, pasi çdo transmetim kalon nëpër rrjete dhe servera të identifikueshëm, ndërsa çdo lëvizje e të dhënave lë gjurmë që dokumentohen. Sipas institucionit, edhe zhvendosja e serverave nuk e mbyll çështjen, pasi çdo ndryshim infrastrukture regjistrohet dhe ndiqet deri në bllokimin në nivel rrjeti.
Në fund, Autoriteti u bën thirrje qytetarëve të mos dërgojnë fonde drejt këtij aplikacioni, duke theksuar se çdo kontribut financon një veprimtari të kundërligjshme, ndërsa transaksionet me kriptomonedha janë të pakthyeshme dhe nuk ofrojnë mundësi rimbursimi apo ankimi.
“Pirateria nuk është shërbim falas, por shkelje e ligjit dhe e punës së të tjerëve”, thekson AMA, duke shtuar se do të vijojë luftën kundër piraterisë dhe u kërkon qytetarëve të zgjedhin vetëm operatorë të licencuar.
Deklarata e AMA-s nw rrjete sociale
“Mashtrimi ka forma të ndryshme. Mos bini pre e tij. Fotot më poshtë i përkasin aplikacionit pirat AlbKanale, të cilin grupet e inspektimit të AMA-s e zbuluan dhe e bllokuan, pasi transmetonte pa autorizim paketat e mbrojtura të Digitalb dhe Tring, kanalet e TV Klan dhe RTSH, si edhe paketat sportive. Pas ndërhyrjes së AMA-s, aplikacioni është jashtë funksionit që prej 11 gushtit 2026.
Read more:Android 17 sjell emoji 3D, kalim më të lehtë nga iOS dhe funksionin “Pause Point”
Por tani po ndodh një tjetër mashtrim. Administratorët e këtij aplikacioni kanë publikuar një njoftim ku pretendojnë se shërbimi është ndërprerë si pasojë e një sulmi kibernetik dhe u kërkojnë përdoruesve të dërgojnë para në formën e kriptomonedhave për rikthimin e tij. Ky pretendim është i pavërtetë. Nuk ka ndodhur asnjë sulm kibernetik.
AlbKanale është jashtë funksionit sepse është një aplikacion i paligjshëm që transmetonte pa të drejta. Ai u bllokua pas një pune të detajuar teknike të AMA-s, që përfshiu monitorimin dhe analizën e trafikut të rrjetit, gjurmimin e transmetimeve deri te serverat burimorë dhe bashkëpunimin me operatorë ndërkombëtarë për raportimin e shkeljeve. Anonimiteti i plotë në këto shërbime nuk ekziston. Çdo transmetim kalon nëpër rrjete dhe servera të identifikueshëm, ndërsa çdo lëvizje e të dhënave lë gjurmë që mund të dokumentohen.
Edhe zhvendosja e serverave nuk e mbyll çështjen. Çdo ndryshim i infrastrukturës regjistrohet dhe ndiqet deri në fund, përfshirë bllokimin në nivel rrjeti. Mos dërgoni para. Çdo pagesë financon drejtpërdrejt një veprimtari të kundërligjshme. Transaksionet me kriptomonedha janë të pakthyeshme dhe nuk ekziston mundësia e rimbursimit apo ankimit. Pirateria nuk është “shërbim falas”, por shkelje e ligjit dhe e punës së të tjerëve. AMA do të vijojë luftën kundër piraterisë dhe gjurmimin e çdo shkeljeje. Zgjidhni operatorë të licencuar.”
