Një fëmijë 1-vjeçar është dërguar sot në Institucionin e Ekzekutimit të Vendimeve Penale në Pojskë, ku ndodhet e ëma e tij që po vuan një dënim prej dy muajsh burg. 34-vjeçarja u arrestua disa ditë më parë në Pikën e Kalimit Kufitar të Murrqanit, në kthim nga Gjermania, në zbatim të një vendimi gjyqësor të formës së prerë, të dhënë në mungesë në vitin 2023, për veprën penale “Dhunë në familje” ndaj vjehrrit të saj.
Sipas familjarëve, 34-vjeçarja është nënë e tre fëmijëve të mitur. Fëmija 4-vjeçar vuan nga probleme shëndetësore, ndërsa një tjetër është 2 vjeç.
Pas kësaj situate avokati i popullit ka shkuar sot në burgun e Pojskës.
Fjala e Avokatit
Që kur jemi vënë në dijeni dje, kemi nisur hetimin e çështjes. Kemi çuar një grup inspektimi në Komisariatin Nr. 6 dhe në bllokun e sigurisë për të verifikuar fazën e parë, ku ne dyshojmë që mund të jemi para shkeljes së procedurës. Duhet kuptuar a është problem sistemik apo është vetëm një rast, sepse një nënë me fëmijën në gji është mbajtur në bllokun e sigurisë për 72 orë, mbase ka dalë një vendim i formës prerë, ka qenë e panevojshme.
Po e hetojmë këtë çështje për të kuptuar këtë hallkën e parë. Ndërkohë që në orët e para të mëngjesit, drejtuesja e Zyrës Rajonale të Avokatit të Popullit është paraqitur këtu në IEVP-në përkatëse, ka kontaktuar të ndaluarën, ka kontaktuar administratën e burgut. Unë kam ardhur bashkë me dy komisionerët, me komisionerin Besnik Deda të sektorit të veçantë që merret me burgjet dhe me policinë, dhe me drejtuesen e Mekanizmit Kombëtar për Parandalimin e Torturës, Ahmet Prençi.
Bëmë inspektimin e kushteve ku po mbahet fëmija, kushteve ku po qëndron nëna dhe kemi vënë në dijeni të gjitha institucionet, prokurorinë, kemi kërkesë edhe për gjykatën. Në bindjen time, ditën e nesërme nëna do të lirohet. Nëse nuk lirohet, do të jemi para shkeljeve procedurale sepse nuk mund të mbahet është e pamundur, qoftë nga dispozitat e Kodit Penal, qoftë nga dispozitat e Kodit të Procedurës Penale, është e pamundur që për veprën për të cilën është dënuar, fëmija që ka në gji të mbahet në këtë IEVP.
Padyshim kushtet këtu janë më të mira sesa në IEVP-të e tjera, unë i inspektova vetë po deshët kemi bërë dhe fotografi për t’i parë kushtet ku po mbahet.Këto janë kushtet ku po mbahet fëmija dhe nëna, por kjo nuk ka rëndësi, ajo nuk duhet të ishte këtu. Në vlerësimin tonë, në interpretimin që ne i bëjmë Kodit Penal dhe Kodit të Procedurës Penale, ajo duhet të lirohet sa më parë. Dhe unë besoj që nesër para orës 12:00 ajo nuk do të jetë më këtu.
Read more:Kuvendi mbyll sesionin ditën e hënë, seanca e fundit në kulmin e protestave kundër Ramës
Pikërisht,prandaj po hetojmë dhe do vëmë në dijeni Inspektoratin e Lartë të Drejtësisë, qoftë për prokurorët ose gjyqtarët, nëse ata kanë qenë në shkelje. Unë nuk dua të nxitohem në konstatime paraprake. Ka dy amnisti penale ndaj të cilave, të cilat mund të kishte përfituar zonja, e vitit 2024 dhe e vitit 2025.Ka argumente që mund ta shpjegojnë pse ajo nuk ka përfituar nga kjo amnisti, qoftë për shkak të veprës penale që është dhuna në familje, qoftë për shkak të një interpretimi që gjykata ka bërë ku e ka trajtuar zonjën si person që i është larguar drejtësisë.
Ne nuk duam të hyjmë në vendimin gjyqësor, sepse ajo është kompetencë e gjykatës dhe apelohet në gjykatë më të lartë, por ka disa pikëpyetje. Pikëpyetja e parë është: nëse vendimi ka dalë në datë 13 maj, pse ka marrë formë të prerë mbas 49 ditësh? Ndërkohë që do duhet të kishte marrë formë të prerë brenda dy javësh. Dhe nëse do kishte marrë formë të prerë brenda dy javësh, do të ishte brenda afatit të amnistisë së vitit 2026.
Pse nuk është përfshirë në amnistinë e vitit 2024? Pra ka disa pyetje për të cilat ne, para se të flasim dhe të japim një konstatim, jemi duke hetuar.
Por ka pikëpyetje. Ka pikëpyetje dhe, në vlerësimin tonë, ajo sot nuk duhet të ishte sot këtu. Është këtu mbase për shkak të neglizhencës, por ndoshta për shkak sepse askush nuk ka ndaluar për të parë që mbas letrave ka një nënë dhe një fëmijë në gji që nuk duhet të ishte në burg. Dhe shpesh dhe kjo tregon dhe burokracinë shtetërore, që shpesh shikohen letrat, kalohet nga një procedurë në tjetrën, nga një letër në tjetrën, dhe askush nuk ndalon për të pyetur: ‘Ky person që do ta vuajë këtë dënim, kush është? Në çfarë rrethanash është?’ Sepse rrethanat në të cilat është zonja, edhe sipas Kodit Penal dhe Kodit të Procedurës Penale, për veprën për të cilën akuzohet, në rrethanat ku është, nuk duhet të ishte bashkë me foshnjën e saj në në burg.
Ne në intervistën që ne i bëmë nuk pati asnjë pretendim të tillë.Nuk ka pasur asnjë ankesë. Të paktën Avokatit të Popullit nuk i është ankuar për këtë çështje. Por është domethënës fakti që zonja ka kaluar kufirin, ka ardhur në Tiranë pa u ndaluar nga policia, që do të thotë nuk kemi të bëjmë me një person që ka qenë në kërkim. Prandaj them që ka disa pikëpyetje edhe për vendimin, edhe për urdhrin e ekzekutimit.
Nga pretendimet e zonjës, është njoftuar kur ka qenë në Gjermani që duhet të paraqitet në komisariatin e policisë. Ka ardhur vullnetarisht dhe është paraqitur në Komisariatin Nr. 6 vullnetarisht. Këtë po e verifikojmë. Kemi një grup inspektimi të Avokatit të Popullit që aktualisht ka përfunduar inspektimin në Komisariatin Nr. 6 dhe është tek blloku i sigurisë.
Por, nëse këtë pretendime qëndrojnë të cilat zonja i ka dhe ne po i verifikojmë nuk jemi përpara një personi që ka qenë në kërkim ose që ka treguar shenja që i është larguar drejtësisë. Megjithatë, thashë, nuk dua të interpretoj vendimet e gjykatës. Për këtë është një gjykatë më e lartë, është Gjykata e Apelit, ama ka disa standarde që janë pikërisht aty për t’u zbatuar si nga prokurorët, nga punonjësit e policisë, nga oficerët e policisë gjyqësore dhe nga gjyqtarët.
Ky është një koment politik që unë do të doja ta shmangja për shkak të detyrës që mbaj. Por për mua, të drejtat e zonjës janë jashtëzakonisht të rëndësishme dhe prandaj kam ardhur sot këtu, prandaj kam dy komisionerët me vete, për t’u garantuar që të drejtat e saj të respektohen.
Kemi dyshimet tona që këtu jemi përpara një në rastin më të mirë, të një neglizhence të punës. Thashë, ndodh shpesh burokracia, shikojnë letrat, kalojnë nga njëra zyrë në tjetrën, nga njëra tavolinë në tjetrën dhe kërkush nuk ndalon për të parë interesin më të lartë të fëmijës, i cili, nëse do të ishte parë, zonja nuk do të ishte këtu me foshnjën e saj për veprën për të cilën akuzohet është dënuar në fakt.
Read more:RrGK kërkon nga Qeveria sigurimin e mbështetjes financiare për strehimoret
Nesër ka pasur një kërkesë për rritjen e dosjes të së drejtës së ankimimit në Gjykatën e Apelit. Në kontaktet që ne kemi patur, bindja ime është që zonja nesër para orës 12:00 do të jetë e lirë. Ne do ta ndjekim në çdo rrethanë dhe aty ku do të konstatojmë që është shkelur ligji, është abuzuar me procedurën, do të kërkojmë nga Inspektoriati i Lartë i Drejtësisë marrjen e masave dhe pastaj, respektivisht, Këshilli i Lartë i Prokurorisë apo Këshilli i Lartë Gjyqësor.
Lajm në përditësim….
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë
