Aktivistja 32 vjeçare turke, Julide Yazici, azilante politike në Francë, e arrestuar më 4 gusht në aeroportin e Rinasit, pasi ajo rezultontë në listën e personave të shpallur në kërkim ndërkombëtar, lëshuar nga Interpol Ankaraja, do të ankimojë të hënën e ardhshme në Gjykatën e Apelit, vendimin e marrë më 7 gusht nga Gjykata e Tiranës për lënien e saj në burg, në pritje të nisjes së procedurave të ekstradimit. Avokati i saj Artan Shllaku tha për Report Tv se do të kërkojë daljen e saj nga burgu dhe lehtësimin e masës, në arrest shtëpie.
Gjykata e Apelit për Krimet e Rënda e Stambollit, e ka dënuar atë me 4 vjet e 2 muaj burgim (mbetur për të kryer 3 vjet 5 muaj e 22 ditë burg), për veprat penale, “Dhënie ndihme logjistike për organizatë terroriste” dhe “Pjesëmarrje në organizatë terroriste”.
Por të afërm të saj kanë treguar se Yazici ishte dënuar vetëm sepse kishte strehuar për një natë një kundërshtar të regjimit të Rexhep Tajip Erdogan, me kërkesën e një mikeshe. Me një historik aktivizmi, në mbështetje të minoritetit kurd dhe pjesmarrëse në protestat kundër pushtetit të Erdoganit, ajo rezulton të ketë bërë disa muaj burg dhe pasi është liruar, është larguar nga Turqia për në Francë ku ka mundur të marrë dhe statusin e refugjates politike.
Përpara gjyqtarit Kujtim Vranici, në seancën për masën e sigurisë aktivistja turke ishte shprehur se nuk kishte qenë në dijeni se ishte shpallur në kërkim ndërkombëtar.
“Kjo çështje është hapur që para dhjetë vitesh dhe kam tetë vjet që une jam rezidente në Francë. Nuk kam pasur dijeni për një urdhër arresti, kjo pasi unë kam ardhur edhe para një viti në Shqipëri dhe kam ndenjur dy javë dhe këtë herë unë kam ardhur për pushime”.
Në fakt shpallja e saj në kërkim ndërkombëtar rezulton të jetë bërë në fund të vitit të kaluar pas vendimit të Apelit në Stamboll më 8 nentor 2025. Yazici kishte deklaruar se kërkonte “një masë më të butë atë të arrestit në shtëpi. Unë nuk duhet të jem e arrestuar, pasi kam tetë vjet që punoj si mësuese në Francë”.
Por gjyqtari pranoi kërkesën e prokurorit për mbajtjen e saj në arrest me burg duke arsyetuar se “ekziston rreziku i largimit (shmangies së ekstradimit) të kësaj shtetaseje, bazuar në ashpërsinë e dënimit për terrorizëm dhe mungesën e lidhjeve të të dyshuarës me Shqipërinë, ç’ka krijon një shtysë psikologjike për t’iu shmangur drejtësisë”, shkruhet në vendimin të cilin Report Tv e disponon.
Beteja për masën e sigurisë nuk është e vetmja që aktivistja turke do të duhet të zhvillojë në Shqipëri. Me mbërritjen e dosjes së saj nga Turqia, ajo do të duhet të nisë procedura të tjera gjyqësore për të kundërshtuar ekstradimin. Mbetet për të parë nëse statusi i saj si refugjate politike në Francë, do të ketë ndikim në vlerësimin e kërkesës së autoriteteve turke.
Kur në vitin 2020, i njohu asaj statusin e refugjatit politik, Gjykata Kombëtare e Azilit në Francë e motivonte vendiin e saj me faktin se “ka një frikë të justifikuar, në kuptim të dispozitave të Konventës së Gjenevës, se do të përndiqet nëse kthehet në vendin e saj për shkak të aktivizmit të saj politik”.
Disa raste të mëhershme të shtetasve turq të kërkuar nga autoritetet e Ankarasë, pasi akuzoheshin për lidhje me rrjetin e klerikut të ndjerë Fetullah Gylen, kanë përfunduar me ekstradimin e tyre në Turqi, edhe në rrethana të diskutueshme.
