Eksperti i ekonomisë dhe aktivisti Pano Soko, gjatë fjalës së tij në protestë, ka lëshuar akuza të forta ndaj modelit ekonomik të qeverisë, duke denoncuar koncesionet afatgjata dhe dështimin e premtimit për shëndetësinë gratis.
Soko kritikoi ashpër përdorimin e Partneritetit Publik-Privat (PPP), duke theksuar se kontratat 35-vjeçare po ngarkojnë brezat e ardhshëm me faturat e aferave të sotme. Ai ngriti pyetjen se çfarë faji kanë qytetarët e së ardhmes që të paguajnë për marrëveshjet e lidhura sot nga zyrtarët që funksionojnë me parimin për të vjedhur sa më shumë gjatë një mandati 4-vjeçar.
Eksperti i ekonomisë analizoi edhe shifrat e sistemit shëndetësor, duke nxjerrë në pah se ndonëse nga taksat e shqiptarëve mblidhen 700 milionë euro në vit për Ministrinë e Shëndetësisë, qytetarët detyrohen të shpenzojnë edhe 1.5 miliardë euro të tjera nga xhepi i tyre.
Sipas Sokos, shqiptarët sot paguajnë taksat dhe dy herë më shumë para jashtë tyre për kujdesin shëndetësor, çka tregon se premtimi për shëndetësi falas ka dështuar plotësisht. Ai shtoi se rreziku kryesor për vendin nuk është vetëm Edi Rama si individ, por vetë modeli i tij i qeverisjes, të cilin e cilësoi si “ramizëm”.
Po ashtu ai kritikoi qeverinë socialiste se ka ecur me modelin “KÇK” (kap çfarë të kapësh) gjatë drejtimit të saj të vendit prej më shumë se 3 mandatesh.
