Korriku është muaji kur Shqipëria hyn në pikun e sezonit veror dhe shifrat tregojnë se këtë vit fluksi i turistëve të huaj është rikthyer në ritëm më të fortë.
1 milion e 955 mijë të huaj hynë në vend vetëm gjatë korrikut, 7.1% më shumë se një vit më parë. Është edhe shifra më e lartë mujore e hyrjeve të të huajve gjatë këtij viti. Por ecuria e korrikut duket më qartë kur shihet në tërësinë e muajve. Në shtatë muaj Shqipëria ka regjistruar mbi 7 milionë hyrje të shtetasve të huaj, rreth 427 mijë më shumë se e njëjta periudhë e 2025-ës, një rritje prej 6.5%.
Duke qenë sezon veror, kjo është dhe arsyeja më e lartë e vizitave të turistëve të cilët zgjodhën vendin tonë për të shpenzuar pushimet e tyre. 99% e hyrjeve të të huajve janë për qëllime personale, ku përfshihen pushimet, vizitat tek të afërmit, por edhe udhëtime të tjera personale. Ndërsa hyrjet për biznes dhe arsye profesionale kanë rënë me 8.9%.
Dhe harta e turistëve mbetet e përqendruar te Europa, 1.83 milionë hyrje erdhën nga vendet europiane vetëm në korrik, ndërsa Europa Jugore vijon të mbajë peshën kryesore.
Me korrikun që kaluam dhe gushtin në kulm, turizmi hyn në fazën më intensive të vitit. Sfida për ekspertët tashmë është që ky fluks të mos mbetet vetëm një rekord hyrjesh, por të përkthehet në më shumë shpenzime, qëndrime dhe të ardhura për ekonominë shqiptare.
Read more:Ikën Sokol Sadushi/ Hapet gara për të zgjedhur kryetarin e ri të Gjykatës së Lartë!
Nga ana tjetër, dhe daljet e shqiptarëve u rritën. Në 7 muaj dolën jashtë vendit 4.9 mln shtetas, ndërsa vetëm në korrik 790 mijë.
Për operatorët turistikë, turizmi 2026 ka shfaqur luhatje, teksa vrulli i turistëve është përqendruar vetëm në disa muaj, ndërsa kanë pritshmëri edhe më të larta për muajt shtator dhe tetor.
