Në Maliq është zhvilluar protesta e radhës kundër planit për riorganizimin e ri territorial, i cili parashikon shkrirjen e kësaj bashkie dhe bashkimin e saj me Bashkinë e Korçës. Banorët dhe aktivistët e pranishëm kanë ngritur zërin kundër atij që e konsiderojnë një projekt që dëmton drejtpërdrejt të ardhmen administrative, ekonomike dhe përfaqësimin e komunitetit lokal.
Gjatë tubimit, organizatorët dhe pjesëmarrësit shprehën keqardhjen për numrin e kufizuar të qytetarëve në shesh, duke e lidhur këtë situatë drejtpërdrejt me klimën e frikës dhe presionin e ushtruar ndaj banorëve nga struktura të pushtetit.
Përmes fjalimeve nga protesta u bë thirrje për reagim mbarëqytetar: “Shkrirja e Bashkisë Maliq do të ndikojë drejtpërdrejt në të ardhmen e qytetit dhe të banorëve tanë. Mos të heshtim përballë këtij vendimi! Banorët duhet të kapërcejnë frikën dhe të dalin publikisht kundër ndryshimit të propozuar territorial.”
Protestuesit lëshuan akuza të drejtpërdrejta ndaj drejtuesve të pushtetit vendor dhe deputetëve politikë që mbulojnë zonën. Përfaqësuesit e komunitetit u kërkuan zyrtarëve të dalin publikisht dhe të deklarojnë qëndrimin e tyre nëse mbështesin apo kundërshtojnë fshirjen e Maliqit nga harta si bashki më vete.
Aktivistët deklaruan se rezistenca e tyre nuk do të ndalet me këtë tubim, duke paralajmëruar vijimin e aksionit opozitar dhe qytetar në terren përmes protestave të tjera në ditët në vijim.
