FIER–Kur kanë kaluar 13 ditë nga zjarri masiv i 4 shtatorit që përfshiu 6 fshatra në njësitë administrative Levan, Qendër dhe Frakull në Fier, duke djegur më shumë se 500 ha ullishte, zëvendësdrejtori për sigurinë publike në Drejtorinë e Policisë Fier, Taulant Gjoka, tha se shkak është një shkëndijë elektrike në një transformator të OSHEE-së.
Nëndrejtori i Policisë së Fierit, Taulant Gjoka, ne interviste për Report tv, thekson se në 9 muajt e parë të vitit, në qarkun e Fierit janë regjistruar 44 vepra penale për shkatërrim prone me zjarr, ku 21 raste janë kualifikuar si shkatërrim me dashje dhe 23 nga pakujdesia. Gjithsej janë 41 autorë të identifikuar dhe arrestuar.
Pjesa më e madhe e zjarreve, veçanërisht ato nga pakujdesia, e kanë origjinën në tokat bujqësore, ku qëllimi i fermerëve është thjesht pastrimi i bimësisë për mbjelljet e ardhshme. Personat e proceduar janë, shumica mbi 70 vjeç, të cilët ndezin zjarrin për barishtet.
“Sigurisht qëllimet mund të jenë përfitim ekonomik, mund të jenë për pastrimin e tokës, për vandalizëm, për dëmtimin e pronës, për fshehjen e një krimi tjetër, por mund të jenë edhe për motive ekstremiste. Do të duhen hetime në kohë dhe mendoj që nuk do të ishte etike as profesionale që në momentet e para të dalim në konkluzione. Në rastet nga pakujdesia, qëllimi i autorit ka qenë për të ndezur zjarrin për të pastruar bimësinë dhe nuk ka pasur mundësi të parashikojë e as ka qenë qëllimi i tij të shkaktojë ato dëme që kanë ardhur në masivin pyjor”, tha numri dy i Policisë së Fierit.
Read more:Përfshihet nga zjarri një banesë në Levan të Fierit, flakët shkrumbojnë totalisht objektin (VIDEO)
Përveç rrezikut për jetën dhe dëmit mjedisor, efektivët u përballën me reagime verbale, fyerje e deri në shtyrje fizike nga banorë që shihnin mundin e një jete teksa digjej. Policia reagoi me qetësi e profesionalizëm, duke mirëkuptuar e solidarizuar me humbjet e qytetarëve
“Unë i falënderoj efektivët për durimin dhe qetësinë që kanë manifestuar sepse realisht përballë shumë kritikave… kanë kaluar edhe në fyerje edhe në shtyrje fizike ndaj punonjësit të policisë, kanë manifestuar një durim dhe një sjellje profesionale”, u shpreh Gjoka.
