Kryetari i Grupit Parlamentar të Partisë Demokratike, Gazment Bardhi, ka lëshuar akuza të forta ndaj Prokurorisë së Posaçme lidhur me vonesat në procedurat parlamentare për ish-zëvendëskryeministren Belinda Balluku. Në ditën e 9-të të reagimeve të tij të njëpasnjëshme, Bardhi deklaron se SPAK po tregohet i tërhequr përballë pushtetit ekzekutiv.
I rikonfirmuar në qëndrimin e tij kritik ndaj vonesave institucional-procedurale, kreu i grupit të PD-së nënvizoi se prokurorët specialë nuk kanë depozituar ende shkresën zyrtare në Kuvend, përkundër gjetjeve të reja hetimore.
Bardhi rikujtoi se vetë institucioni i SPAK-ut ka njoftuar publikisht zgjerimin e hetimeve dhe zbulimin e pasurive të paluajtshme të padeklaruara, çka sipas tij duhet të shoqërohej menjëherë me kërkesën për arrestim.
“Dikush t’i kujtojë se ende nuk ka sjellë në Parlament kërkesën për heqjen e imunitetit për arrestimin e Belinda Ballukut, edhe pse vetë ka njoftuar sekuestrimin e një vile të dytë të fshehur dhe akuzat e reja për korrupsion, pastrim parash dhe fshehje pasurie,” deklaron kreu i grupit parlamentar të PD-së.
Në përmbyllje të reagimit të tij, numri një i deputetëve demokratë akuzoi drejtpërdrejt organin e akuzës se po sinkronizon hapat proceduralë me kalendarin politik të kryeministrit Edi Rama.
“Dikush t’i kujtojë edhe se detyra e SPAK është të zbatojë ligjin, jo të presë Edi Ramën sa të zgjidhë hallet e mëdha politike,” përfundon reagimin e tij Gazment Bardhi.
