Në Tiranë po zhvillohet Takimi i 22-të i Komitetit Parlamentar të Stabilizim-Asociimit Shqipëri-Bashkimi Europian (KPSA), në një moment të rëndësishëm për rrugëtimin e Shqipërisë drejt anëtarësimit në BE.
Në fjalën e tij, Kryetari i Kuvendit, Niko Peleshi, e cilësoi anëtarësimin në Bashkimin Europian si qëllimin strategjik kombëtar dhe “prioritetin e prioriteteve” të Kuvendit, duke theksuar se Shqipëria ka hyrë tashmë në një fazë përcaktuese të negociatave.
“Anëtarësimi në Bashkimin Europian është qëllimi ynë strategjik kombëtar, destinacioni i vetëm për të ardhmen e Shqipërisë dhe shqiptarëve në rajon dhe, si rrjedhim, prioriteti numër një i Kuvendit të Shqipërisë”, u shpreh z.Peleshi.
Read more:Plagosi dy persona në Laprakë, shpallet në kërkim autori
Duke iu referuar progresit të bërë gjatë vitit 2026, ai veçoi avancimin në grupkapitullin e parë “Themeloret” dhe mbylljen e kapitujve të parë të negociatave. Sipas tij, sfida e radhës është e qartë: të kalohet nga miratimi i ligjeve te zbatimi efektiv dhe i matshëm i reformave.
“Një ligj nuk është i mirë vetëm sepse përafron një direktivë, por kur është i zbatueshëm, prodhon rezultate dhe i shërben mirëqenies së qytetarëve”, theksoi Kryetari i Kuvendit.
Në këtë fazë, Kuvendi synon të forcojë rolin e tij përmes kontrollit parlamentar, llogaridhënies së ekzekutivit dhe shqyrtimit me përparësi të legjislacionit që lidhet me detyrimet e negociatave. Një vëmendje e veçantë do t’i kushtohet edhe përfshirjes së shoqërisë civile dhe sektorit privat, në mënyrë që reformat të lidhen me nevojat konkrete të ekonomisë dhe qytetarëve.
Përtej përafrimit të legjislacionit, puna ka nisur edhe për përgatitjen e institucioneve shqiptare për fazën pas anëtarësimit. Kjo përfshin përshtatjet ligjore dhe institucionale, forcimin e administratës dhe krijimin e kapaciteteve të nevojshme për pjesëmarrjen e Shqipërisë në vendimmarrjen europiane.
Një vend të rëndësishëm në këtë strategji zë edhe diplomacia parlamentare. Peleshi nënvizoi nevojën për intensifikimin e kontakteve me parlamentet e 27 vendeve anëtare të BE-së, duke vlerësuar mbështetjen e vazhdueshme të institucioneve europiane dhe parlamenteve partnere.
Në këtë kuadër, më 28 shtator, Kuvendi i Shqipërisë do të mbledhë në Tiranë përfaqësues të parlamenteve të vendeve anëtare dhe kandidate, Parlamentit Europian dhe institucioneve europiane, në Konferencën Ndërparlamentare “Agjenda Strategjike e Zgjerimit të BE-së dhe anëtarësimi i Shqipërisë”.
Duke vlerësuar rolin e Komisionit për Europën dhe Punët e Jashtme, Këshillit Kombëtar për Integrimin Europian dhe KPSA-së, Kryetari i Kuvendit theksoi se rruga drejt BE-së kërkon rezultate konkrete dhe përmbushje të përgjegjësive.
“Ne jemi të qartë se rruga drejt BE-së matet me rezultate dhe përmbushje të përgjegjësive. Por, njëkohësisht, jemi të bindur se vullneti ynë politik e shoqëror është i papërkulur dhe se Kuvendi i Shqipërisë do të qëndrojë në ballë të këtij procesi.”,u shpreh z. Peleshi.
