Këtë të martë në orën 21:00 në stadiumin ‘Giuseppe Meazza’ të Milanos do zhvillohet gjysmëfinalja e kthimit për Kupën e Italisë mes Interit dhe Comos. Sfida e parë mes tyre përfundoi 0-0 dhe sot një nga skuadrat do sigurojë biletën për në finale. Pak ditë më parë Interi fitoi 3-4 në Como për ndeshjen e Serie A, ndaj dueli mes tyre shihet me interes.
Trajneri Cristian Chivu do ketë dy mungesa të rëndësishme te Interi, pasi mungojnë për shkak të dëmtimeve mbrojtësi Bastoni dhe kapiteni Lautaro Martinez. Interi është ‘me një dorë’ te titulli kampion në Serie A dhe do kërkojë edhe një trofe të dytë, gjë që i mungon klubit zikaltër që nga viti 2009-10 me tripletën e famshme të siguruar me Jose Mourinhon në stol.
Nëse siguron finalen dhe trofeun e dhjetë të Kupës, Interi do ‘mbushte arkën’ me afërsisht 30 milionë euro të ardhura, që janë më shumë se të rëndësishme në kushtet kur ekipi është eliminuar nga Champions League. Kjo shumë do vinte nga shpërblimet, biletat, reklamat dhe bonusi për pjesëmarrjen në Superkupën e ardhshme të Italisë. Nga ana tjetër, për Comon do ishte diçka historike pasi nuk ka qenë kurrë më parë në finalen e Kupës së Italisë.
Formacionet e mundshme:
Inter: Martinez; Akanji, Acerbi, Augusto; Dimarco, Zielinski, Calhanoglu, Barella, Dumfries; Bonny, Thuram Trajner: Cristian Chivu
Como: Butez; Kempf, Ramon, Diego Carlos; Valle, Da Cunha, Perrone, Diao; Baturina, Paz; Douvikas Trajner: Cesk Fabregas
