Elisabetta Ferretto, ish-modelja 50-vjeçare nga Montagnana, Padova, e njohur si një nga gratë e para që denoncoi abuzimet e financierit të Nju Jorkut, Jeffrey Epstein, është gjetur pas disa ditësh kërkim.
Autoritetet e Interpolit konfirmuan se Ferretto ndodhet aktualisht në një burg në Florida, pas kërkesës së Ministrisë së Brendshme italiane për ndihmë nga forcat e rendit në SHBA. Lajmi iu komunikua stacionit të karabinierëve në vendlindjen e saj dhe autoriteteve konsullore italiane në SHBA.
Familja e 50-vjeçares nuk kishte dëgjuar nga ajo që nga 22 prilli, disa ditë pas kthimit nga pushimet e Pashkëve, të cilat i kaloi me të afërmit në Montagnana. “Është fundi i një makthi”, i tha nëna e saj këshilltares Paola Barbierato, siç raportohet nga Il Gazzettino. Megjithatë, detajet mbi akuzat ndaj Ferrettos nuk janë bërë ende publike.
Read more:Hayden Panettiere pranon publikisht se është biseksuale
Dy javë më parë, kontaktet e Ferrettos ndërprenë papritur: telefoni i saj ndaloi së marrë mesazhe dhe profilet në rrjetet sociale u çaktivizuan. Kjo heshtje e papritur tronditi familjarët, të cilët raportuan zhdukjen e saj në Prokurorinë Publike të Rovigos. Raporti u dërgua më pas në Ministrinë e Punëve të Jashtme, e cila aktivizoi kanalet diplomatike me autoritetet amerikane.
Elisabetta Ferretto, e njohur dikur me mbiemrin Tai, ishte ndër gratë e para që doli nga anonimiteti për të denoncuar krimet e Jeffrey Epstein, i cili kreu vetëvrasje në burgun e Nju Jorkut në gusht 2019. Ajo rrëfeu për New York Post se ishte larguar nga rezidenca luksoze e Epstein pasi kishte refuzuar propozimet e tij seksuale.
Read more:Prindërit diplomatë pjesë e skandalit, vret veten i riu që Epstein i la 5 milionë euro në testament
Sipas Ferrettos, ëndrra e saj për të arritur sukses në modë e çoi në SHBA në vitin 2001. Në vitin 2004, agjenti i saj i propozoi të takonte një burrë që “do t’i ndryshonte jetën” – i cili nuk ishte askush tjetër veç vetë Epstein, një mik dhe këshilltar financiar i Leslie Wexner, pronarit të Victoria’s Secret. Gjatë një audicioni të dyshuar si rremë, Epstein dyshohet se u përpoq të bënte një qasje seksuale, por Ferretto refuzoi dhe iku.
