Drejtoria Rajonale e Policisë në Gjilan, përmes Njësisë Rajonale të Trafikut Rrugor dhe stacioneve policore, ka njoftuar se gjatë periudhës 08.05.2026 – 14.05.2026, në kuadër të zbatimit të planeve operative për siguri në trafik, janë shqiptuar gjithsej 1,549 gjoba.
Sipas njoftimit, gjatë kësaj periudhe janë ndërmarrë edhe aktivitete të tjera në terren, përfshirë hetimin e aksidenteve dhe shqiptimin e masave ndëshkuese për shkelje të ndryshme.
Policia ka bërë të ditur se janë hetuar 10 aksidente trafiku me dëme materiale dhe 14 aksidente trafiku me të lënduar. Po ashtu, janë shqiptuar 11 gjoba për mos përdorim të rripit të sigurisë, pesë gjoba për përdorim të telefonit gjatë ngasjes dhe 24 gjoba për modifikim të automjeteve, përkatësisht vendosje të folieve të errëta.
Read more:Superliga e Kosovës vazhdon me xhiron e 33-të, vëmendja në derbin Drita – Ballkani
Në njoftim thuhet se ndaj 42 ngasësve janë shqiptuar masa e ndalimit të drejtimit të mjeteve motorike.
Drejtoria Rajonale e Policisë në Gjilan u ka bërë thirrje të gjithë ngasësve që të ulin shpejtësinë dhe të respektojnë rregullat e qarkullimit rrugor.
“Shpejtësia nuk është krenari, por shkak i tragjedisë. Respektoni rregullat e trafikut, mos përdorni telefonin gjatë vozitjes, vendosni rripin e sigurimit dhe tregoni kujdes ndaj këmbësorëve, respektoni sinjalistikën dhe semaforët. Siguria në rrugë është përgjegjësi e përbashkët”, thuhet në apelin e Policisë. /Telegrafi/
