Rusia ka miratuar një ligj që i lejon bankës së saj qendrore dhe institucioneve të tjera financiare të mirëmbajnë sistemet e tyre të mbrojtjes dhe të pajisin stafin e tyre për të zmbrapsur sulmet me dronë, sipas një dokumenti të lëshuar nga dhoma e ulët e parlamentit rus.
Ukraina goditi degën e bankës qendrore në Sevastopol të Krimesë me një raketë të dielën, tha guvernatori lokal Mikhail Razvozayev, duke pretenduar se ishte një raketë Storm Shadow e prodhuar në Britani.
Ai shtoi se ndërtesa u përfshi nga flakët. Sistemet mbrojtëse nga dronë mund të instalohen pranë bankës qendrore, si dhe pranë Sberbank, bankës më të madhe të vendit, dhe Unionit Rus të Kompanive të Transferimit të Parave. Stafit në këto kompani do t’u lejohet të mbajnë armë.
Këto institucione do të mbulojnë kostot e mbrojtjes së tyre kundër sulmeve me dronë, tha Anatoly Akshatov, kreu i Komitetit të Financave të Dumës Shtetërore, dhoma e ulët e parlamentit rus, sipas agjencisë së lajmeve RBC.
Sulmi ndaj zyrave të bankës qendrore në Sevastopol ishte i pari në një degë të bankës qendrore që nga fillimi i luftës. Nuk ka pasur raportime për sulme ndaj zyrave kryesore të Sberbank. Dje, të martën, Alexander Shokhin, kreu i lobit më të fuqishëm të biznesit në Rusi, i tha Presidentit Vladimir Putin se kompanitë janë të gatshme të financojnë blerjen e armëve të rënda dhe sistemeve elektronike për të mbrojtur infrastrukturën e tyre nga sulmet me dronë.
