Në një kohë kur digjitalizimi i shërbimeve publike po ndryshon mënyrën se si qytetarët dhe bizneset ndërveprojnë me administratën, portali e-Albania sjell një funksionalitet të ri që u jep mundësi administratorëve të bizneseve të autorizojnë punonjës apo persona të tjerë për të përdorur shërbimet publike elektronike në emër të biznesit.
Drejtoresha e e-Albania është Nevila Repishti shpjegon për Report TV se si do të funksionojë ky proces.
“Një administrator biznesit mjafton që në profilin e tij të shkojë në seksionin ‘Autorizimet e mia’ ai mund të krijojë një autorizim në nivel shërbimi, të përcaktoj afatin e vlefshmërisë, shërbimet që do t’i delegojë përdoruesit të tyre dhe çdo gjë ndodh në kohë reale. Njoftohet personi i autorizuar për ta përdorur, ai mjafton të hyj në llogarinë e tij si qytetar, të shkojë në shërbimin për të cilin ai është i autorizuar dhe të përdor në fund butonin ‘përdor si i autorizuar’”, shprehet Repishti.
Repishti thotë se ky shërbim është një ndihmë në punën e përditshme dhe operacionet e administratorit të një biznesi.
“Mendojmë që do të rrisë efikasitetin e përdorimit të shërbimeve publike të biznesit duke i dhënë lirshmëri administratorit që të bëjë të gjitha veprimet operacionale në llogarinë e tij në e-Albania”, thekson ajo.
Çdo veprim që do të kryhet nga ‘personi i autorizuar’ për llogari të biznesit, është i kontrollueshëm, duke shmangur hapësira për abuzime.
“Si biznesi ashtu edhe personi i autorizuar njoftohen në kohë reale. Ky proces ka një gjurmueshmëri dhe kontroll të plotë për administratorin e biznesit. Ai mund ta revokojë në çdo kohë një autorizim të dhënë, mund ta shtojë vlefshmërinë e tij, mund të përzgjedhë që të përdorë një ose më shumë shërbime personi i autorizuar”, thotë Repishti.
Brenda 31 korrikut bizneset duhet të dorëzojnë pasqyrat financiare. Repishti bën thirrje që ta shfrytëzojnë këtë ‘funksionalitet’ edhe për këtë rast
“Nëse sjellim në vëmendje që një nga shërbimet më të përdorur deri më 31 korrik që është afati nga QKB që bizneset të dorëzojnë pasqyrat financiare, incentivojmë të gjithë bizneset që të kenë një kontroll më të sigurt të llogarisë, duke zgjidhur një person të autorizuar, një punonjës për të deleguar përdorimin e këtij shërbimi”, thotë drejtoresha e e-Albania.
Një muaj pas prezantimit të platformës së re, e-Albania 2.0, që sjell më shumë thjeshtësi dhe shpejtësi në marrjen e shërbimeve, drejtoresha thotë se janë marrë 1.8 milionë shërbime përmes portalit, ndërkohë që janë regjistruar për herë të parë 13 mijë qytetar dhe biznese.
