Konflikti për kontrollin e Aeroportit të Vlorës vijon të prodhojë tensione. Mëngjesin e sotëm u shënuan përplasje verbale mes përfaqësuesve të kompanisë Mabco të biznesmenit Behgjet Pacolli dhe kompanisë “2A Group” të Valon Ademit. Ky i fundit vendosi të bllokojë me kamione hyrjen e kantierit.
Sipas palës së Pacollit, aktiviteti po pengohet edhe pas vendimit të Gjykatës së Lartë që i njeh Mabcos të drejtën e votës në asamblenë e shoqërisë koncesionare.
Pas afro një ore tensionesh, punëtorët arritën të futen në kantierin e aeroportit.
Ndërkohë, shoqëria koncesionare VIA u kanë bërë thirrje institucioneve të hetojnë rastin, ndërsa deri tani nuk ka pasur reagim zyrtar nga policia apo institucionet e tjera.
Përplasje për Aeroportin e Vlorës, administratori i VIA-s i përgjigjet Pacollit: Nuk ka nevojë për forcë për të punuar, ka nevojë për kontratë
Konflikti për kontrollin dhe vijimin e punimeve në Aeroportin Ndërkombëtar të Vlorës vijon të prodhojë tensione mes palëve të përfshira në projekt.
Pas përplasjeve verbale të regjistruara mëngjesin e sotëm mes përfaqësuesve të kompanisë Mabco të biznesmenit Behgjet Pacolli dhe kompanisë “2A Group” të Valon Ademit, ku kjo e fundit bllokoi me kamionë hyrjen e kantierit, ka reaguar publikisht administratori i shoqërisë koncesionare Vlora International Airport (VIA), Vegim Hoxha.
Deklarata e plotë:
I nderuar z. Pacolli,
Në cilësinë e administratorit të shoqërisë koncesionare VIA dhe si personi i vetëm i autorizuar ligjërisht për të përfaqësuar këtë shoqëri ndaj të tretëve, po ju drejtohem publikisht juve, si dhe opinionit publik, për të sqaruar disa pretendime dhe veprime që kërkojnë përgjigje.
Fillimisht, duhet saktësuar se shoqëria Mabco Construction SA ka pasur një kontratë për kryerjen e punimeve me shoqërinë VIA. Kjo kontratë përfshinte ndërtimin e terminalit, kullës së kontrollit, objektit të administratës, hangarëve të avionëve, objektit të kargos, objektit të zjarrfikësve dhe objekteve të tjera përbërëse të projektit.
Kontrata është lidhur më datë 03.10.2022, nga përfaqësuesit tuaj: z. Valon Lluka, në cilësinë e administratorit të VIA-s në atë kohë, dhe z. Nelson Cela, në cilësinë e administratorit të shoqërisë Mabco Construction, dega në Tiranë.
Vlera e kësaj kontrate ishte 62 milionë euro, ndërsa afati i parashikuar për përfundimin dhe dorëzimin e punimeve ishte 30 muaj.
Mbi bazën e kësaj kontrate, kompania juaj ka kryer punime, ka dorëzuar situacione, ka lëshuar fatura dhe është paguar nga shoqëria VIA në vlerë mbi 26 milionë euro.
Prandaj, ishte jo vetëm e papritur, por edhe e pakuptueshme, që pas një marrëdhënieje disa-vjeçare kontraktore, në muajin mars të këtij viti, ju dhe kompania juaj deklaruat se nuk e njihni këtë kontratë.
Është një qëndrim interesant, të kryesh punime mbi një kontratë, të faturosh mbi të, të marrësh pagesa mbi të, e më pas të pretendosh se kontrata nuk ekziston ose nuk njihet. Dokumentet, për fat të mirë, kanë një zakon të keq, mbeten.
Pas këtij qëndrimi, shoqëria VIA ju ka dërguar mbi 10 shkresa zyrtare, me qëllim që të gjendej një mënyrë për vazhdimin e marrëdhënies kontraktore. Përgjigjja juaj dhe e kompanisë suaj ishte refuzimi. Jo vetëm refuzim, por edhe pretendime të cilat, për një kompani që pretendon seriozitet, janë vështirë të komentohen pa cenuar seriozitetin e vetë komentit.
Në vijim të këtij refuzimi dhe për shkak të shkeljeve të shumta të konstatuara, përfshirë vonesat e konsiderueshme në kryerjen e punimeve, shoqëria VIA u detyrua të ndërmarrë hapat e nevojshëm drejt shkëputjes së kontratës.
Dëmi që kompania juaj i ka shkaktuar shoqërisë VIA llogaritet paraprakisht në mbi 5 milionë euro, pa përfshirë dëmet e tjera që mund të evidentohen në vijim.
Sot, përballë opinionit publik, paraqiteni sikur dëshironi të hyni në kantier për të vazhduar punimet e mbetura. Por, në vend të rrugës institucionale, po tentohet hyrja me forcë, me presion, me shantazh dhe me një narrativë që synon të krijojë konfuzion publik.
Dua të jem shumë i qartë:
Nuk ka nevojë për forcë për të punuar. Ka nevojë për kontratë.
Por përpara se të hyni në kantier, duhet t’i përgjigjeni publikisht disa pyetjeve të thjeshta:
Mbi çfarë baze kontraktuale kërkoni të vazhdoni punimet?
Sa do t’i kushtojë shoqërisë VIA kjo “gatishmëri” që po tentohet të imponohet me forcë?
A jeni i gatshëm të vazhdoni punimet e mbetura sipas çmimeve të kontratës paraprake dhe sipas planit ekzistues të financimit?
Nëse përgjigjja është po, ejani nesër dhe nënshkruajmë kontratën.
Nëse përgjigjja është jo, atëherë tregojuni njerëzve që po përpiqeni t’i manipuloni se problemi nuk është dëshira për të punuar. Problemi është diçka tjetër.
Shumat që ju pretendoni, në vlera 200–300 milionë euro, nuk do të pranohen nga VIA, të paktën për aq kohë sa unë jam administrator i saj. Unë mbaj përgjegjësi ligjore për çdo veprim timin dhe nuk mund të dëmtoj, rëndoj apo çoj drejt falimentimit një shoqëri koncesionare, duke e ngarkuar me shpenzime enorme dhe pretendime financiare që nuk mbështeten në bazë të pranueshme kontraktuale.
VIA ka një plan financimi. Nga ai plan nuk mund të dilet sipas dëshirave, presioneve apo skenarëve të krijuar jashtë institucioneve. Sepse ndryshe, nuk kemi më kontratë, nuk kemi më përgjegjësi dhe nuk kemi më projekt. Kemi vetëm një tentativë për imponim.
Prandaj, z. Behgjet, thirrja ime publike është e thjeshtë:
Kujdesuni për imazhin e shoqërisë VIA.
Kujdesuni për dokumentet që keni nënshkruar.
Dhe mbi të gjitha, tregojuni njerëzve të vërtetën:
A doni të punoni sipas kontratës dhe kushteve reale, apo synimi është të impononi pretendime qindra-milionëshe mbi një shoqëri që ka detyrime ligjore, financiare dhe institucionale?
VIA nuk do të drejtohet me presion.
VIA nuk do të mbingarkohet me borxhe të imponuara.
VIA nuk do të përdoret si instrument për interesa që nuk kanë lidhje me përfundimin e projektit.
Me respekt institucional,
Vegim Hoxha
Administrator i Vlora International Airport
Valon Ademi i ka ndaluar hyrjen ne aeroportin e Vlorës, reagon Pacolli: Përse nuk po vepron ligji? Kjo është vetëgjyqësi e askush nuk mban përgjegjësi
Behgjet Pacolli ka reaguar sërish për bllokimin e hyrjes në kantier, kësaj radhe me kamionë të tonazhit të rëndë, me urdhër të ortakut të tij në aeroportin e Vlorës, Valon Ademi. Duke iu referuar vendimit të Gjykatës së Lartë, që i dha të drejtën administrimit të punimeve të aeroportit, Pacolli shkruan se në Shqipëri ligjin nuk po funksionon e shteti nuk po merr masa për zbatimin e vendimeve të gjykatave.
Reagimi i Behgjet Pacollit
Grupet kriminale prapë kanë bllokuar aksesin në Aeroportin e Vlorës, ku Mabco ka investuar mbi 310 milionë euro!
APELOJME TE SPAK QË TË FILLON HERTIMIN E THELL.
nuk është qeshtje konflikti, ështe qështje më e thell!!!
A është KRIM bllokimi i një aktiviteti të ligjshëm me roje private, mjete të rënda dhe vetëgjyqësi?
Nëse po, pse nuk po vepron askush?
Nëse secili në këtë vend mund të marrë disa roje private, të bllokojë hyrje-daljet, të pengojë zbatimin e vendimeve gjyqësore dhe të imponojë vullnetin e tij me forcë, atëherë a jetojmë në Republikën e Shqipërisë apo në Republikën e Rojeve Private?
Çfarë roli kanë rojet private në këtë vend?
Si është e mundur që një kompani private të vendosë se kush hyn dhe kush nuk hyn në një kantier, pavarësisht vendimeve të Asamblesë së Ortakëve, pavarësisht vendimeve të Gjykatës së Lartë dhe pavarësisht kërkesave të institucioneve shtetërore?
Si është e mundur që një kompani sigurie private të bllokojë fizikisht hyrjen në një aset strategjik kombëtar dhe askush të mos mbajë përgjegjësi?
Nëse çdo kompani në Shqipëri mund të marrë disa roje private, të vendosë kamionë në hyrje dhe të shpallë veten mbi ligjin, atëherë:
• Për çfarë na duhen gjykatat?
• Për çfarë na duhen institucionet?
• Për çfarë na duhet shteti?
Sot nuk po diskutojmë më për një konflikt biznesi.
Sot po diskutojmë për ekzistencën e shtetit ligjor. Sot është vënë në pikëpyetje autoriteti i shtetit. Sot shtrohet pyetja themelore: a zbatohen vendimet e Gjykatës së Lartë në Republikën e Shqipërisë apo jo?
Sepse, nëse një vendim i formës së prerë i Gjykatës mund të bllokohet nga një grup njerëzish me kamionë dhe roje private, atëherë problemi nuk është më Aeroporti i Vlorës.
Problemi është vetë shteti ligjor.
Prej muajsh, Mabco po përballet me pengesa të vazhdueshme dhe të papranueshme. Prej javësh po shohim vandalizëm, bllokime, dëmtime të pronës dhe pengim të punimeve.
Sot po shohim moszbatim të hapur të ligjit para syve të të gjithëve, si dhe privim të së drejtës për veprim dhe lëvizje.
Ku janë institucionet që duhet t’u japin përgjigje qytetarëve?
Kjo nuk është më një çështje vetëm e Mabco-s apo e 2A-së.
Kjo është një çështje që prek çdo qytetar.
Kush i zbaton ligjet në këtë vend?
Ligjin për shoqëritë tregtare?
Vendimet e Gjykatës së Lartë?
Apo rojet private?
Përplasjet në aeroportin e Vlorës, reagon VIA: Behgjet Pacolli po na dëmton imazhin, nuk ka qëllim rifillimin e punimeve! Akt sulmi e vetëgjyqësie
“Vlora International Airport – VIA” ka reaguar publikisht pas përplasjeve të regjistruara dje në kantierin e aeroportit ku bën përgjegjës kompaninë e Behgjet Pacollit, Mabco, për dëmtim imazhi të shoqërisë koncensionare dhe ushtrim të dhunës mbi institucionet dhe mbi administrimin ligjor të projektit.
Në reagimin publik, VIA shkruan se kompania e Pacollit, nuk punoi për ndërtimin e aeroportit të Vlorës kur e kishte detyrim të punonte e të zbatonte kontratat, ndërsa shton se Mabco u paraqit në kantier me persona të paautorizuar për të marrë administrimin e projektit me presion e dhunë mbi stafin.
REAGIM PUBLIK
Shoqëria Koncesionare “Vlora International Airport – VIA” sh.p.k. dënon me forcë ngjarjen e sotme në Kantierin/Zonën e Koncesionit të Aeroportit Ndërkombëtar të Vlorës.
Ashtu siç VIA paralajmëroi publikisht dhe institucionalisht, deklaratat e fundit të Mabco-s dhe të z. Behgjet Pacolli për një të ashtuquajtur “rikthim në kantier” nuk kishin si qëllim rifillimin real të punimeve, por krijimin e një incidenti artificial, dëmtimin e imazhit të shoqërisë koncesionare dhe ushtrimin e dhunës dhe presionit mbi institucionet dhe mbi administrimin ligjor të projektit.
Pamjet e sotme flasin vetë.
Mabco nuk u paraqit në kantier me një plan pune, me procedurë, me autorizim të vlefshëm, me dokumentacion teknik, me koordinim institucional apo me një proces normal ndërtimor. Mabco u paraqit me persona të paautorizuar, me grumbullim, me dhunë dhe presion fizik dhe me një skenar të qartë për të prodhuar konflikt, përplasje dhe pamje mediatike.
Ky nuk ishte rifillim punimesh.
Ky ishte një akt i pastër presioni, sulmi dhe vetëgjyqësie.
Mabco nuk punoi kur kishte detyrimin të punonte, kur duhej të zbatonte kontratat, kur duhej të respektonte afatet, standardet dhe përgjegjësitë e saj. Sot, në vend që të japë llogari për dështimet dhe shkeljet e saj, tentoi ta shndërrojë kantierin e Aeroportit të Vlorës në skenë konflikti publik, me qëllim të vetëm dëmtimin e reputacionit të VIA-s dhe krijimin e perceptimit të rremë se kontrolli i projektit mund të merret me forcë.
VIA sqaron opinionin publik se bartëse e vetme e Kontratës Koncesionare/PPP për ndërtimin dhe operimin e Aeroportit Ndërkombëtar të Vlorës është Shoqëria Koncesionare “Vlora International Airport – VIA” sh.p.k.
MABCO nuk është koncesionari.
MABCO nuk është Autoriteti Kontraktor.
MABCO nuk është organ administrues i VIA-s.
MABCO nuk ka asnjë tagër të hyjë në kantier, të komandojë staf, të ushtrojë presion, të thërrasë palë të treta apo të imponojë me forcë një situatë faktike jashtë ligjit dhe jashtë Kontratës Koncesionare.
Asnjë pretendim kontraktor, tregtar apo shoqëror nuk i jep të drejtë askujt të sulmojë dhe të ushtrojë presion mbi stafin e shoqërisë koncesionare, të pengojë aktivitetin e ligjshëm të VIA-s apo të krijojë kaos të qëllimshëm në një projekt strategjik kombëtar.
Aeroporti Ndërkombëtar i Vlorës nuk është pronë e Mabco-s.
Nuk është skenë për propagandë personale.
Nuk është instrument për të mbuluar dështime kontraktore.
Nuk është hapësirë ku ligji zëvendësohet me turmë, sulme, presione dhe kamera.
VIA u bën thirrje institucioneve ligjzbatuese të dokumentojnë çdo veprim të kundërligjshëm të ndodhur sot dhe të garantojnë menjëherë rendin, sigurinë dhe paprekshmërinë e kantierit/Zonës së Koncesionit.
VIA do të vijojë të mbrojë me çdo mjet ligjor stafin e saj, kantierin, integritetin e projektit dhe interesin publik që lidhet me Aeroportin Ndërkombëtar të Vlorës.
Aeroporti i Vlorës do të përfundohet përmes ligjit, kontratës dhe institucioneve — jo përmes presionit, vetëgjyqësisë dhe propagandës.
Shoqëria Koncesionare
“Vlora International Airport – VIA” sh.p.k.
