Këtë të mërkurë, Konferenca e Kryetarëve është zhvilluar me debate të forta mes opozitës dhe mazhorancës.
Pavarësisht diskutimeve nuk ka një dakordësi mes palëve për mocionin me debat dhe çësthja i ka kaluar seancës plenare.
Deputetja e PD, Ina Zhupa ka deklaruar se është e turpshme sesi PS fabrikon prova për të sulmuar protestat. Zhupa tha se është mirë që mazhoranca të marrë në konsideratë kërkesat e protestuesve.
“Është e turpshme të fabrikoni prova për të sulmuar protestuesit. Kryeministri merret me protestuesit, ndërsa juve ju është ndarë detyra t’i sulmoni ata. Por protestuesit ju përbuzin dhe ju urrejnë masivisht.
Ju harroni ose bëni sikur harroni se protesta nuk ka 2, 3 apo 10 protestues, siç mendoni ju se po sulmoni. Protesta përfaqëson mijëra qytetarë dhe, po e përsëris, ata ju urrejnë.
E vetmja rrugë për ju është të merrni në konsideratë kërkesat e tyre. Nuk keni rrugë tjetër.
Ne nuk kemi nevojë të marrim leje për të përfaqësuar qytetarët, sepse kjo nuk ka nevojë për shpallje. Ne e bëjmë këtë çdo ditë dhe e bëjmë me nisma konkrete. Ky është ndryshimi mes nesh dhe jush: ne jemi me qytetarët, ndërsa ju jeni me karrigen”, deklaroi Zhupa.
