Deputetja e Partisë Demokratike, Albana Vokshi, ka bërë me dije se ka shfrytëzuar tribunën e Asamblesë Parlamentare të Këshillit të Evropës për të denoncuar situatën politike në Shqipëri dhe për të mbrojtur kauzën e protestave qytetare, duke i cilësuar protestat masive si kryengritje e qytetarëve kundër korrupsionit të qeverisë.
Përmes një mesazhi, Vokshi sqaroi se ka vënë theksin te të drejtat e qytetarëve për t’u dëgjuar dhe te domosdoshmëria e reagimit ndërkombëtar ndaj presioneve që ushtrohen ndaj tubimeve paqësore.
“Në Asamblenë Parlamentare të Këshillit të Europës ngrita zërin për protestat paqësore në Shqipëri dhe për të drejtën e qytetarëve për t’u dëgjuar. Theksova se mijëra shqiptarë, kryesisht të rinj, kanë dalë në rrugë për të kërkuar sundim të ligjit, luftë kundër korrupsionit, mbrojtjen e pronës dhe mjedisit, si edhe zgjedhje të lira e të ndershme”, u shpreh ligjvënësja e PD-së.
Më tej, deputetja demokrate deklaroi se i ka bërë thirrje zyrtare Këshillit të Evropës që të ndërhyjë dhe të mbajë një qëndrim të prerë në mbështetje të rendit demokratik në Shqipëri, duke dënuar tentativat për të heshtur zërin opozitar dhe qytetar.
“I bëra thirrje Këshillit të Europës të qëndrojë në krah të qytetarëve shqiptarë, të dënojë çdo formë presioni ndaj protestuesve paqësorë dhe të mbështesë një zgjidhje demokratike për krizën politike në Shqipëri. Demokracia mbrohet kur qytetarët dëgjohen, jo kur heshten”, përfundoi Vokshi.
