Debati mes Lëvizjes Vetëvendosje dhe Lidhjes Demokratike të Kosovës për një marrëveshje politike vazhdon edhe pas takimeve mes palëve.
Kërkesat për ndarjen e posteve të larta shtetërore, veçanërisht çështja e presidentit dhe kryetarit të Kuvendit, janë kthyer në një përplasje publike mes deputetëve të dy partive.
Deputeti i LVV-së, Ilir Kërçeli, ka rikujtuar ofertën që, sipas tij, Vetëvendosje u ka bërë LDK-së dhe PDK-së për bashkëpunim institucional.
Kërçeli e ka cilësuar si një koncesion tërheqjen e një emri politik për t’i hapur rrugë një kandidati konsensual për president.
Read more:A do të ketë kandidat konsensual për president? Ky është qëndrimi i partive politike
“Për PDK-në: po e zgjedhim një president konsensual dhe kryetarin e Kuvendit për PDK-në. Njërën nga tri pozitat e larta të shtetit. Dhe gjatë votimit për president mund të votoni kundër, mirëpo merrni pjesë në formimin e institucioneve”, ka shkruar Kërçeli.
Sa i përket LDK-së, deputeti i LVV-së ka rikujtuar marrëveshjen e kaluar të bashkëqeverisjes, duke theksuar se ajo parti, sipas tij, kishte marrë një numër të konsiderueshëm postesh edhe kur kishte më shumë deputetë.
Read more:LDK: Po vazhdojnë edhe sonte sulmet në rrjete sociale ndaj nesh, formë e organizuar hibride
“Për LDK-në, e cila me 30 deputetë kishte hyrë në qeverisje duke e dhënë edhe pozitën e presidentit, edhe kryeparlamentarit, zëvendëskryeministrin dhe tre ministra, ose kryetarin e Kuvendit e tri ministri, edhe pse sot i ka 18 deputetë. Po ashtu, edhe për deputetët e LDK-së: merrni pjesë në votim dhe votoni kundër”, ka deklaruar Kërçeli.
Ai e ka nisur reagimin e tij edhe me një krahasim të votave, duke argumentuar se “asnjëri nga kandidatët e LDK-së, po as nga subjektet e tjera, nuk i ka mbi 120 mijë vota”.
Nga ana tjetër, deputeti i LDK-së, Arben Gashi, i është përgjigjur argumenteve se partia e tij po kërkon më shumë nga sa i takon në raport me rezultatin zgjedhor.
Gashi ka sjellë në vëmendje bashkëqeverisjen e kaluar mes LVV-së dhe LDK-së, duke kujtuar shkarkimin e një ministri dhe një nënkryetari të LDK-së, veprim që, sipas tij, ishte në kundërshtim me marrëveshjen e atëhershme dhe që përfundoi me rrëzimin e qeverisë.
Sipas Gashit, aktualisht raporti parlamentar prej 53 deputetësh të LVV-së me 18 të LDK-së është rreth 3 me 1 dhe ky raport duhet të reflektohet edhe në ndarjen e përgjegjësive institucionale.
“LVV-së, si forcë më e madhe, i takon të zgjedhë cilat dy prej tyre i konsideron prioritare: Kryeministrin dhe Kryetarin e Kuvendit, ose Presidentin dhe Kryetarin e Kuvendit. Kjo është ndarje proporcionale. Kjo është ndarje e drejtë”, ka shkruar Gashi.
Megjithatë, ai ka theksuar se mosmarrëveshja nuk lidhet vetëm me postin e presidentit. Sipas tij, problemi kryesor mbetet mungesa e mirëbesimit politik dhe e një programi të përbashkët, ndërsa dallimet mes dy partive janë të dukshme edhe në politikën e jashtme, ekonomike e sociale dhe në mënyrën e qeverisjes.
“Edhe çështja e Presidentit është e zgjidhshme. Nuk ka arsye që nga 80 e më shumë deputetë të mos gjendet një kandidat i denjë. Nëse një emër nuk është i pranueshëm, ka të tjerë. Pra, emri nuk është problemi kryesor”, ka deklaruar Gashi.
Ndërkohë, PDK-ja dhe Aleanca kanë refuzuar ftesat e kryeministrit në detyrë dhe kryetarit të LVV-së, Albin Kurti, për takime lidhur me konstituimin e institucioneve dhe zgjidhjen e çështjes së presidentit.
Read more:Mbeti jashtë Kuvendit në dhjetor, Gashi rikandidon sërish për deputet
LDK-ja i ka pranuar ftesat për takim, por pas takimit të fundit, kryetari i saj ka deklaruar se palët mbeten ende shumë larg një marrëveshjeje.
Përplasja e fundit publike mes Kërçelit dhe Gashit tregon se, pavarësisht komunikimit politik, dallimet për ndarjen e posteve dhe kushtet e një bashkëpunimi institucional mbeten ende të thella.
