Protesta qytetare kundër qeverisë dhe kryeministrit Edi Rama shënon sot ditën e 90-të, ndërsa protestuesit shprehen se nuk do të tërhiqen dhe do të vijojnë të qëndrojnë në shesh.
Pedagogu dhe anëtari i “Shqipëria Bëhet”, Erjon Selmani, falënderoi News24 që ka ndjekur protestën që prej ditës së parë.
“Ju falënderoj si media, sepse na keni ndjekur nga dita e parë, keni qenë bashkëudhëtarët tanë. Na keni ndjekur pa ngjyra dhe filtra dhe na keni transmetuar gjithçka siç ka ndodhur”, u shpreh Slemani.
Ai tha se askush nuk e kishte parashikuar që protesta do të zgjaste 90 ditë, duke theksuar se pakënaqësia qytetare është grumbulluar prej vitesh.
“Askush nuk e priste që gjithçka të zgjaste 90 ditë. Shqiptarët kanë duruar kaq vite, por vjen një moment që gota derdhet”, deklaroi ai.
Selmani komentoi edhe përpjekjet për të minimizuar numrin e protestuesve, duke thënë se protesta nuk është zbehur pavarësisht kohëzgjatjes dhe ngjarjeve të tjera që kanë ndodhur gjatë kësaj periudhe.
“Ne jemi dhe do të vijojmë të mbetemi këtu”, tha ai, duke nënvizuar vendosmërinë e protestuesve për të vijuar tubimet.
Read more:‘Pjetër Budi’ hap dyert për vitin e ri shkollor, Rama ndan pamjet nga shkolla e re në Tiranë (FOTO)
Sipas Slemanit, protesta është një lëvizje atipike për kushtet e Shqipërisë dhe ka kaluar në disa faza evoluimi. Ai tha se gjatë këtyre 90 ditëve ka pasur propozime dhe përpjekje të ndryshme për organizimin e saj.
Duke qenë se protesta nisi nga qytetarët dhe është mbajtur prej tyre, Slemani tha se ajo nuk prodhoi një lider të vetëm, siç mund të ishte pritur. Për koordinimin e mëtejshëm të protestave, sipas tij, po punohet për ngritjen e një grupi organizator.
