Shqipëria e mbylli tremujorin e dytë të vitit 2026 me një bilanc pozitiv në energji.
Prodhimi vendas u rrit ndjeshëm, importet ranë dhe eksportet u shtuan. Por shifrat e prill-qershorit tregojnë vetëm një pjesë të ecurisë së prodhimit. Vetëm pak javë pas përfundimit të këtij tremujori të favorshëm, thatësira dhe temperaturat e larta kanë rikthyer nevojën për blerje energjie nga jashtë.
Sipas të dhënave të INSTAT, gjatë periudhës prill-qershor prodhimi neto vendas i energjisë elektrike arriti në 2 mijë e 361 GWh, me një rritje prej 34.4% krahasuar me të njëjtën periudhë të një viti më parë. Ndërsa konsumi arriti në 1 mijë e 619 GWh, ose 6.2% më shumë se një vit më parë
Read more:Gara globale për robotët/ SHBA, Kina dhe Europa përballen për dominimin e robotëve humanoidë
Rritja erdhi kryesisht nga hidrocentralet. Prodhimi i HEC-eve publike u rrit me 43.6%, ndërsa ai i hidrocentraleve private dhe koncesionare me 18%.
Në të njëjtën kohë një rol gjithnjë e më të madh po merr energjia nga burimet e tjera të rinovueshme, ku përfshihet kryesisht prodhimi fotovoltaik. Këto burime prodhuan 448 GËh energji në vetëm tre muaj ose 55.6% më shumë se një vit më parë. Në total ato përbënë 19% të prodhimit vendas të energjisë elektrike gjatë tremujorit të dytë.
Megjithatë hidroenergjia vijon të dominojë. Duke bërë që vendi ynë të varet nga sezonaliteti. Në periudhën prill-qershor, prodhimi i lartë vendas uli nevojën për blerje energjie nga jashtë.
Importet bruto ranë me 21.5%, në 569 GWh ndërsa eksportet u rritën me 55.4% duke arritur në 991 GWh. Bilanci i shkëmbimeve me jashtë rezultoi pozitiv me rreth 422 GWh.
Por nga një tremujor kur eksportet ishin dukshëm më të larta se importet, thatësira dhe konsumi i lartë i verës kanë rikthyer nevojën për furnizim nga tregjet e huaja.
Në fund të muajit gusht KESH zhvilloi dy ankande për blerje energjie duke siguruar rreth 110 mijë MËh deri më 30 shtator, me një kosto prej 16.2 milionë eurosh.
Si pasojë e thatësirës edhe niveli në liqenin e Fierzës ka rënë ndjeshëm nën nivelin e 275 metrave. Duke bërë që sasia e ujit që po mbërrin në liqen të jetë ndjeshëm më e ulët se kapaciteti i shkarkimit të hidrocentralit. Një bilanc që tregon presionin mbi rezervën hidrike të Fierzës.
Në këtë situatë një pyetje e rëndësishme mbetet roli i dy TEC-eve lundruese në Vlorë, “Tigri 1” dhe “Tigri 3”. Në një vend ku thatësira mund të rikthejë brenda pak javësh nevojën për importe milionëshe, dy impiante të krijuara pikërisht për të prodhuar energji në periudhat e mungesës kanë pasur deri tani një kontribut shumë të kufizuar në prodhimin total afro 1% në 2025, 77 mijë MWh. Ndërsa sipas KESH nga shtator 2024 kur këto impiante u vendosën në funksione deri në 12 gusht 2026 prodhimi kumulativ arriti në 109 mijë MËh.
